Konstıtýtsııa kúni qarsańynda Kókshetaýda patrıottyq aktsııasy ótti

KÓKShETAÝ. QazAqparat - Qazaqstan Respýblıkasynyń Konstıtýtsııasy kúni qarsańynda Kókshetaýda Memlekettik Tý 100 metr bıiktikke kóterildi. Patrıottyq aktsııaǵa Aqmola oblysynyń ákimi Ermek Marjyqpaev qatysty, dep habarlaıdy QazAqparat tilshisi.

Aktsııa barysynda aımaq basshysy Ermek Marjyqpaev aqmolalyqtardy alda kele jatqan Qazaqstan Respýblıkasynyń Konstıtýtsııasy kúnimen quttyqtady.

«Mereke qarsańynda biz qala ómirindegi taǵy bir mańyzdy oqıǵanyń kýási bolyp otyrmyz. QR Memlekettik týyn Kókshetaýdyń eń bıik núktesine ornattyq. Otandastarymyzdyń arqasynda Qazaqstan týy álemdik jarystar men olımpıadalarda birneshe ret kóterildi. Osy jarqyn, merekelik kúnde beıbitshilik pen baqyt tileımin», - dedi oblys ákimi.

Sonymen birge, Ermek Marjyqpaev óńirde negizgi áleýmettik-ekonomıkalyq kórsetkishterdi oryndaýǵa qol jetkizilgenin atap ótti.

«Jyl sońyna deıin oblys boıynsha 700 myń sharshy metr turǵyn úıdi paıdalanýǵa berý josparlanǵan, bul ótken jyldyń kórsetkishinen 100 myńǵa artyq. Eki jyl ishinde «Aýyl – el besigi» jobasy aıasynda Aqmola oblysynyń 13 aýylynyń 85 myń turǵynynyń ómir súrý sapasy jaqsardy», - dep qosty aımaq basshysy.

Oblys ákimi atap ótkendeı, «Alty jobany iske asyrý arqyly osy jyly ortalyqtandyrylǵan sýmen jabdyqtaýǵa qoljetimdilik kórsetkishin qalalyq eldi mekender boıynsha 99 paıyzǵa, aýyldyq eldi mekender boıynsha 84 paıyzǵa deıin arttyrýǵa múmkindik beredi. Ónerkásip ónimderin óndirý kólemi 605 mıllıard teńgeni qurady. Jalpy, bıyl oblys boıynsha 13 myńǵa jýyq jańa jumys orny ashyldy, olardyń basym bóligi turaqty jumys oryndary.