Konstıtýtsııa kúni qarsańynda Aqmola oblysynda sý jańa qyzmettik kólikter tapsyryldy

KÓKShETAÝ. QazAqparat - QR Táýelsizdiginiń 30 jyldyǵy jáne Konstıtýtsııa kúni qarsańynda Aqmola oblysynyń ákimi Ermek Marjyqpaev polıtsııa jəne órt sóndirý qyzmeti, oblystyq tabıǵı resýrstar jáne tabıǵat paıdalanýdy retteý basqarmasy, kommýnaldyq qyzmet, bilim basqarmasy jáne «Qazposhta» AQ oblystyq fılıalyna sý jańa 44 arnaıy qyzmettik avtokólikter men traktorlardyń kiltin tabys etti, dep habarlaıdy QazAqparat tilshisi.

Abylaı han alańynda ótken saltanatty sharada aımaq basshysy óńirde jyldan jylǵa quqyq qorǵaý organdary men kommýnaldyq qyzmetterdiń materıaldyq-tehnıkalyq bazasy jaqsaryp kele jatqandyǵyn atap ótti.

«Bıyl egemendigimizdiń 30 jyldyǵynyń mereıtoıyn qarsy alyp otyrmyz. Bul atqarylǵan jumystarymyzdy qorytyndylap, jetistikterimizdi saralaıtyn kezeń. Osy táýelsizdigimizdiń arqasynda ózimizdiń Ata zańymyzdy qabyldadyq. Barshańyzdy Qazaqstan Respýblıkasy Konstıtýtsııasy kúnimen quttyqtaımyn. Bul mereke biz úshin erekshe. Búgingi kúni quqyq qorǵaý orǵandary men tótenshe jaǵdaılar salasynyń qyzmetkerlerine el tynyshtyǵy men qoǵam qaýipsizdigin qamtamsyz etý, tótenshe jaǵdaılardy aldyn alýda úlken mindetter júktelip otyr. Aqmola oblysynyń tártip saqshylary Memleket basshysynyń alǵa qoıyp otyrǵan mindetterin abyroımen atqarýda. Sońǵy ýaqytta oblys ákimdigi tarapynan jergilikti polıtsııa qyzmetiniń materıaldyq tehnıkalyq jaǵynan qamtylýyna barynsha qoldaý kórsetilip keledi»,- dedi aımaq basshysy.

Sonymen qatar, Ermek Marjyqpaev aldaǵy ýaqytta da osyndaı ıgi isterdiń jalǵasyn taýyp, memlekettik organdardyń avtoparkiniń nyǵaıtyla beretinin atap ótti.

Shara barysynda oblys ákimi bir top aqmolalyq jastarǵa jeke kýálikterin tapsyrdy.