Konstıtýtsııa el azamattarynyń teń quqyǵyn qamtamasyz etedi – sýdıa
Ulan Qajykenniń aıtýynsha, Konstıtýtsııada sot bıligi týraly taraý aıyryqsha orynǵa ıe. Óıtkeni bılikterdiń bólý prıntsıpterine sáıkes, sot bıligin belgileý- bul azamattardyń, memlekettik organdardyń, uıymdardyń quqyqtaryn, bostandyqtaryn jáne zańdy múddelerin qorǵap, Konstıtýtsııany, zańdardy, basqa normatıvtik aktilerdi jáne Qazaqstan Respýblıkasynyń halyqaralyq kelisimsharttaryn oryndaýdy qamtamasyz etý.
«Konstıtýtsııa el azamattarynyń teń quqyǵyn qamtamasyz etedi. Sottardyń negizgi qyzmeti ádil sotty júzege asyrý bolyp tabylatynyn atap ótý qajet. Ádil sot - zańdylyqty, negizdilikti jáne sot sheshimderiniń jalpylaı mindettiligin qamtamasyz etetin tártipte azamattyq jáne qylmystyq isterdi qaraý boıynsha sotpen júzege asyrylatyn memlekettik is-árekettiń túri», - dedi sýdıa.
Sonymen qatar, ol medıatsııa - sýdıalardyń jumys júktemesin azaıtýǵa jáne qoǵamdaǵy qaqtyǵystardy sottan tys sheshýge baǵyttalǵanyn atap ótti.
«Baǵyttardyń biri sot protsesinde jańa tehnologııalardy qoldaný bolyp tabylady. Bul aqparattyq jańashyldyq sot óndirisin ári qaraı jetildirýdi kózdeıdi. Atalǵan salada olardyń damýy eki jaqty mánge ıe: olar azamattardyń ádil sotqa qoljetimdiligin jeńildetedi, al ekinshi jaǵynan sottardyń jumysyn jeńildetedi, bıýrokratııany jáne qaǵazbastylyqtyń aldyn alady. Jalpy alǵanda aqparattyq tehnologııany damytý ádil sotty júzege asyrýdyń ashyqtyǵyna qol jetkizýge baǵyttalǵan. Aqparattyq tehnologııanyń qarqyndy damýy kezinde elektrondy ádil sotty damytý da ózekti», - dedi Ulan Qajyken.
Spıkerdiń sózinshe, kazirgi zamanǵy qazaqstandyq sot júıesi jetilý satysynda.
«Sýdıalardyń kásibı deńgeıin arttyrýmen qatar, kúshti jáne derbes sot bıligin qalyptastyrý qajet. Sot bedelin jáne oǵan qoǵamnyń senimin qalyptastyrý, qoǵamnyń quqyqtyq sanasyn jaqsartýǵa kúsh salý kerek»,- deıdi ol.
