Konstantın Gorovenko «Ertis» klýbynyń sport dırektory qyzmetine taǵaıyndaldy

ASTANA. KAZINFORM - Bul jóninde komandanyń baspasóz qyzmeti málim etti.

Ony qazaqstandyq fýtbol jankúıerlerine «Qaırat», «Qaınar», «Jeńis», «Alma-Ata», «Suńqar», «Megasport» syndy klýbtary jáne Qazaqstan quramasynyń oıynshysy retinde jaqsy tanıdy.

Bapkerlik mansabynda «Suńqar», «Jetisý», «Shahter», «Atyraý» jáne «Kaspıı» klýbtaryna basshylyq jasady.

Sondaı-aq «Qaırattyń» jastar komandasymen 2017 jyly Qazaqstan Birinshi lıgasynyń qola júldegeri boldy. 2021 jyly «Maqtaaral» komandasymen Birinshi lıganyń kúmis júldesine qol jetkizip, Premer-lıgaǵa joldama aldy.

Ol bıyl «Atyraý» komandasynda bas bapker boldy. Komandanyń kórsetkishiniń tómen bolýyna baılanysty atalǵan qyzmetinen ketýge májbúr boldy.

K.Gorovenko Qazaqstan jastar quramasynyń aǵa jattyqtyrýshysy bolyp qyzmet atqarǵan.