«Altaıdyń aýasy» satylymǵa shyqty – sheteldegi qazaq baspasózi
«QazAqparat» HAA shet elderde qazaq tilinde taraıtyn aqparat kózderine aptalyq sholýyn usynady.
«Altaıdyń aýasy» satylymǵa shyqty – CNR
Shańǵy tebý maýsymynyń bastalýyna oraı Altaı qalasy Genaral taýy halyqaralyq qar shańǵy demalys aýdanynda Sıýedý poshta mekemesi iske qosylyp, resmı túrde Altaıdyń aýasyn satý jumysyn bastady, dep habarlaıdy Qytaıdyń «Ortalyq halyq radıosy» aqparat portaly.
Atalǵan BAQ-tyń málimetinshe, bul aýany jedel joldama arqyly joldaıtyn eldegi tuńǵysh poshta mekemesi esepteledi.
6 jeltoqsanda Sıýedý poshta bólimshesiniń ujymy «Altaı aýasy» konservilengen ónimderin tanystyrdy.
Altaı aımaqtyq poshta basqarý mekemesiniń málimetinshe, aýany Qytaıdyń jer-jerine jedel joldama arqyly jetkizý qurlyq jáne áýe joly arqyly iske asady.
Qytaıdaǵy Qazaq shıpahanasy 1-shi dárejeli syılyqqa ıe boldy – ukilialtay
Jaqynda Qytaı etnıkalyq medıtsına qaýymdastyǵynyń úshinshi sessııasynyń ekinshi keńes otyrysy ótip, Qytaı etnıkalyq medıtsına qaýymdastyǵynyń ǵylym jáne tehnologııa syılyǵy tabys etildi.
Beıjińde ótken akademıkter men dástúrli qytaı medıtsınasy magıstrleriniń akademııalyq almasý konferentsııasynda Altaı aımaqtyq dástúrli Qazaq medıtsınalyq aýrýhanasy («Qazaq emshiligi shıpahanasy» – avt.) 2023 jylǵy Qytaı etnıkalyq medıtsına qaýymdastyǵynyń Ǵylym jáne tehnologııany damytý syılyǵynyń bas júldesin jeńip aldy. Bul týraly osy aptada Qytaıdyń Ukilialtay aqparattyq portaly jazdy.
Qytaılyq basylymnyń dereginshe, bul shıpahana (klınıka) joldaǵan 3 zertteý jobasy 1-dárejeli syılyqqa, «Qazaq emshiligindegi qyzdyrmamen (japsyrmamen) emdeýdi klınıkada qoldaný» jobasy 2-dárejeli syılyqqa, taǵy
3 ǵylymı jobasy 3-dárejeli syılyqqa ıe boldy.
Altaı aımaqtyq Qazaq emshiligi shıpahanasynyń saýyqtyrý bóliminiń meńgerýshisi, aǵa dáriger Gúldana Ánasqanqyzy tilshige bergen suhbatynda, bul jetken jetistiktiń bári atalǵan emdeý ortalyǵy qyzmetkerleriniń ortaq eńbegi ekenin aıtady. Budan keıingi ýaqytta da áriptesteri tynbaı jumys istep, qalyń halyqtyń densaýlyǵyn qorǵaýǵa daıyn ekendigin tilge tıek etti.
Basylymnyń málimetinshe, Qytaı Ulttyq dárigerlik qoǵamynyń ǵylym-tehnıka baǵytyndaǵy bul syılyǵyn eldiń Ǵylym-tehnıka mınıstrligi, Memlekettik ǵylym-tehnıka syılyǵy qyzmet keńsesi bekitken.
Aıta keteý kerek, qazaqtyń shıpagerlik dástúrin zamanaýı emdeý, densaýlyq saqtaý isterimen ushtastyrý maqsatynda 1985 jyly Qytaıdyń Altaı aımaǵynan tuńǵysh ret «Altaı aımaqtyq qazaq shıpahanasy» ashyldy. Búginde qazaq shıpagerliginiń ǵylymı turǵydan jumys júrgizýine jan-jaqty múmkindikter ashylǵan. Munda qazaqtyń san ǵasyrlar boıy tájirıbeden ótken emdeýdiń úlgileri bulaý, synyqshylyq, bóbekterdi maımen sylaý, densaýlyqty qorǵaý sekildi san túrli ádisi keń qoldanylady. Qajyrly eńbektiń nátıjesinde 9 bólimdi oqýlyq qurastyrylyp, qazaq emshiligi joǵary oqý oryndarynda oqytyla bastaǵan.
Tashkentte Qazaqstandyq ýnıversıtettiń fılıaly ashylady – «ÓzA»
Tashkent oblysy Shyrshyq qalasynda M.Áýezov atyndaǵy Ońtústik Qazaqstan ýnıversıtetiniń kommertsııalyq emes aktsıonerlik qoǵamynyń fılıaly ashylady. Osyǵan baılanysty Mınıstrler kabınetiniń tıisti qaýlysynyń jobasy jarııalandy. Bul týraly osy aptada ózbekstandyq «ÓzA» aqparat agenttigi habarlady.
Fılıal qyzmetiniń negizgi baǵyttary – ekonomıka salalary úshin joǵary bilikti mamandardy daıarlaý, bilim, ǵylym jáne óndiristiń úzdiksizdigi men júıeliligi. Sondaı-aq álemniń bedeldi bilim jáne ǵylym ortalyqtarymen ıntegratsııalaný qaǵıdattary negizinde mamandar men ǵylymı kadrlardy daıarlaý jáne qaıta daıarlaý júıesin jańǵyrtý josparlanǵan.
Túrik yntymaqtastyq jáne úılestirý agenttigi (TIKA) Qazaqstanda túrik tili synybyn ashty – «TRT»
TIKA Qazaqstannyń Qaraǵandy qalasyndaǵy E.Bóketov atyndaǵy Qaraǵandy ýnıversıtetinde túrik tili synybyn ashqan. Bul týraly Túrkııa Radıo Televızııa portaly habarlady.
E.Bóketov atyndaǵy Qaraǵandy ýnıversıtetiniń rektory Nurlan Dýlatbekov ýnıversıtettiń shet tilder fakýlteti ǵımaratynda ashylǵan synypqa baılanysty sóılegen sózinde ýnıversıtet stýdentteri arasynda túrik tiline qyzyǵýshylyqtyń joǵary ekenin aıtqan.
TIKA vıtse-prezıdenti Úmıt Nadjı Iorýlmaz 1995 jyldan beri Qazaqstanda ártúrli salada qyzmetterin atqaryp kele jatqandaryn túsindirip, olardyń ishinde bilim salasyndaǵy jobalardyń orny erekshe ekenin tilge tıek etken. TIKA-nyń osy ýaqytqa deıin elorda Astana men Shymkentte túrik synyptaryn ashqanyn atap kórsetken Iorýlmaz aldaǵy ýaqytta basqa qalalardaǵy ýnıversıtetterde de ashýdy jalǵastyratyndaryn aıtqan.
Iran men Qazaqstan eki el arasyndaǵy kelisimderge qol qoıdy - «Parstoday»
Iran men Qazaqstan eki eldiń ókilderi arasyndaǵy Ekonomıkalyq yntymaqtastyq komıssııasynyń 19-shy otyrysynda yntymaqtastyq kelisimderine qol qoıdy, dep habarlaıdy «Parstoday» aqparat agenttigi.
Atalǵan aqparat agenttiginiń málimetinshe, Irannyń Aýylsharýashylyq jıhad mınıstri Muhammad Álı Nıkbaht Qazaqstan Premer-mınıstriniń orynbasary ári Saýda jáne ıntegratsııa mınıstri Serik Jumanǵarınmen kezdesýinde eki el arasyndaǵy yntymaqtastyq jónindegi birlesken komıssııanyń kelissózderiniń barysyna rızalyǵyn bildirgen.
Iran men Qazaqstan birlesken komıssııasynyń 19-shy otyrysynyń yntymaqtastyq qujaty men eki el arasyndaǵy 3 mıllıard dollarǵa deıingi kommertsııalyq baılanystardyń jol kartasyna Irannyń Aýylsharýashylyq jıhad mınıstri men Qazaqstan Premer-mınıstriniń orynbasary qol qoıdy.
Sonymen qatar Iran standarty men Qazaqstan metrologııa ınstıtýty arasyndaǵy metrologııa salasyndaǵy yntymaqtastyq týraly memorandýmǵa, sondaı-aq Qazaqstannan keletin mal etiniń saýdasyna qoıylatyn sanıtarlyq-veterınarlyq protsedýralar men talaptarǵa Iran men Qazaqstan eki eliniń ókilderi de qol qoıǵan.
Sheteldik tilshiler Shyńjańnyń Altaı aımaǵyna bardy – «Halyq gazeti»
5 jeltoqsanda Ortalyq Azııa men Reseı elderinen kelgen jýrnalıster toby Qytaıdyń Shyńjańyndaǵy Altaı qalasy Genaral taýy halyqaralyq taý shańǵysy kýrortyna jáne kóshedegi asyl tastardy boıaý stýdııasyna bardy, dep habarlaıdy «Halyq gazeti».
Qytaılyq BAQ-tyń dereginshe, olar sondaı-aq Altaıdyń tabıǵı peızajdary men mádenı erekshelikteri týraly bilý úshin, Qar mekeni turǵyndar raıonynda dombyradan kúı tyńdady.
Uıymdastyrýshylar Altaı aımaǵy qar-muzdyń kórkem mekeni ǵana emes, mádenıettiń máıegi tereńde jatqan jer ekenin BAQ delegatsııasy múshelerine túsindirýge tyrysqan.
BAQ ókilderi sońynda ondaǵan shańǵy trassalary, tamasha ınfraqurylymy jáne ozyq shańǵy jabdyqtary bar Genaral taýy Halyqaralyq taý shańǵysy kýrortyna barǵan.
