Konsaltıngtik bıznestiń kómeginsiz ekonomıka salalaryn damytý múmkin emes
ALMATY. QazAqparat - Konsaltıngtik bıznestiń kómeginsiz ekonomıka salalaryn damytý múmkin emes. Bul týraly búgin Almatyda ótken «Qazaqstandaǵy basqarýshylyq konsaltıngtiń halyqaralyq standarty» atty dóńgelek ústel barysynda aıtyldy.
«Menedjment, basqarý boıynsha konsýltanttar - Qazaqstanda ǵana emes, búkil álem boıynsha jańa mamandyq. Ol mamandyqtardyń halyqaralyq tizimine tek 2009 jyly ǵana engizildi. Álemde basqarý boıynsha konsýltanttar dıplomyn beretin myqty eki-aq bıznes mektebi bar. Biri - Frantsııada, ekinshisi - Ońtústik Afrıkada. Bizdiń menedjment boıynsha Qazaqstan konsýltanttary palatasy Halyqaralyq menedjment konsaltıng boıynsha ınstıtýttar keńesiniń múshesi. Oǵan 50 el múshe. Olardyń ishinde búkil álemdik ishki jalpy ónimniń 70% óndiretin úlken 20 el de bar. Minekı, el ekonomıkasynyń barlyq salasynyń ilgeri damýyna basqarý boıynsha konsýltanttardyń róli óte zor. Konsaltıng - damýdyń ajyramas bóligi. Bizdiń uranymyz «Ádepke, biliktilikke jáne táýelsiz paıymǵa negizdelgen jetistik», - dedi menedjment boıynsha Qazaqstan konsýltanttary palatasy basqaramasynyń tóraıymy Gúlsim Aqtamberdıeva. Alǵash 2010 jyly qurylǵan shaqta palatanyń bar-joǵy 3-aq múshesi bolǵan eken. Al búginde ol 70-ten astam joǵary bilikti konsýltanttardy biriktiredi. Olar menedjment tetikteri arqyly ekonomıkanyń ár salasynda qyzmet atqaratyn jeke jáne memlekettik kompanııalarǵa, sondaı-aq memlekettik organdarǵa olardyń jumystaryn jaqsartýǵa kómektesedi. Sondaı-aq palatanyń qoldaýymen jas konsýltanttar arasynda biliktilik trenıngteri ótkizilip turady. Trenıngtiń bir kúngi baǵasy orta eseppen 200 AQSh dollaryn quraıdy.
