Konor Makgregor Habıb Nýrmogamedovtan jeńilip qaldy
ASTANA. QazAqparat - AQSh-tyń Las-Vegas qalasyndaǵy «T-Mobile Arena»-da aralas jekpe-jektiń (MMA) tarıhyndaǵy eń aıtýly aıqastardyń biri, UFC 229 týrnıriniń aqtyq saıysy - ırlandııalyq Konor Makgregor men reseılik Habıb Nýrmagomedovtyń aıqasy aıaqtaldy, dep habarlaıdy QazAqparat tilshisi.
«Ǵasyr aıqasy» atalyp ketken kezdesýde Nýrmogamedov alǵashqy raýndta birden ózine yńǵaıly balýandyq ádiske saldy. Qarsylasyn tapjyltpaı basqanymen, Konor saýatty qorǵana bildi. Aıqastyń osylaısha soqqy almasý tártibimen ótpegenine yrza bolmaǵan zaldyń ýili arenany sharlap ketti. Alǵashqy raýnd tórt mınýttyq partermen ótti.
Ekinshi raýndta Habıbtiń aýyr soqqysy dál tıdi. Parterge qaıta túsip qalǵan Konordyń joly bolmaǵany anyq. Úshinshi mınýtta ırlandııalyqty taǵy qulatyp alǵan reseılik aıtarlyqtaı soqqysyn darytyp úlgerdi. Ekinshi raýnd Habıb tarapynan bir jaqty sabaý tártibimen aıaqtaldy.
Úshinshi raýndta Konor aldyńǵy eki raýndtaǵy olqylyqtyń ornyn toltyryp, birneshe soqqysyn ótkizdi. Alaıda betpe-bet aıqasta Qap taýynyń qabylany shydas beretinin kórsetkisi kelgendeı. Habıbtiń birneshe klınch ádisteri jemissiz aıaqtaldy.
Tórtinshi raýnda Habıb Nýrmogamedov qarsylasyn qylqyndyrý ádisimen jeńiske jetti.
Aıta ketsek, osy jekpe-jektiń anderkartynda týrnırdiń eń mańyzdy kezdesýleriniń biri - jeńil salmaqtaǵy Tonı Fergıýson men Entonı Pettıstiń aıqasy ótken bolatyn. Eki raýnda sozylǵan aıqasta Entonı Pettıstiń qoly synyp, 34 jastaǵy Fergıýson jeńis týyn jelbiretti.
Aıta ketsek, buǵan deıin Konor Makgregor Habıb Nýrmagomedovpen ótetin jekpe-jekten 100 mln dollar tabýy múmkin ekenin habarlaǵan bolatynbyz.
Foto: sport.inform.kz
