Kóńildi starttar men sheberlik sabaqtary: Astanada jańa jyldyq oıyn-saýyq bastaldy
ASTANA. KAZINFORM - 28 jeltoqsanda Astananyń bes ornynda kontsertter, estafetalar, kóńildi starttar, syılyqtary jáne t.b. bar merekelik baǵdarlamalar bastaldy, dep jazdy elorda ákimdiginiń resmı saıty.
Sonymen qatar elordanyń alty aýdanynda muz aıdyndary, syrǵanaqtar, bezendirilgen shyrshalar, jańa jyldyq jármeńkeler, shaǵyn arhıtektýralyq formalar, kontserttik baǵdarlamalar, fotoaımaqtar jáne t.b. qazirdiń ózinde qala turǵyndarynyń qýanyshyna aınalyp úlgerdi.
Saryarqa aýdanyndaǵy qalalyq alańda (elorda ákimdigi ǵımaratynyń aldynda) jańajyldyq baǵdarlama saǵat 12.00-de bastalyp, 14.00-ge deıin jalǵasty. Qala qonaqtary men turǵyndary úshin kásibı hokkeıshilerdiń qatysýymen shaıbaly hokkeıden sheberlik synyby, sonymen qatar shyǵarmashylyq ujymdardyń qatysýymen kontserttik baǵdarlama uıymdastyryldy.
Almaty aýdanynda Táýelsizdik dańǵyly boıyndaǵy Oqýshylar saraıynyń aýmaǵynda saǵat 12.00-de balalar shyǵarmashylyq ujymdarynyń qatysýymen merekelik kontserttik baǵdarlama bastalyp, 13.00-ge deıin jalǵasty.
Nura aýdanynda «Astana Arena» stadıonynyń avtoturaǵynda arnaıy syılyqtary bar merekelik is-sharalar saǵat 12.00-de bastaý alyp, 13.00-ge deıin jalǵasty. Saǵat 15.00-den 16.00-ge deıin mánerlep syrǵanaýdan sheberlik sabaǵy, 19.30-dan bastap estafetalyq jarystar men kontserttik baǵdarlama jalǵasyn tapty.
Saraıshyq aýdanyndaǵy «Qazaq eli» monýmenti janyndaǵy alańda merekelik is-shara saǵat 14.00-de bastaldy. Іs-shara qonaqtary kóńildi starttarǵa qatysyp, syılyqtar utyp aldy.18.00-den 20.00-ge deıin estrada juldyzdary men shyǵarmashylyq toptardyń qatysýymen kontserttik baǵdarlama ótti.
Esil aýdanynyń EKSPO aýmaǵynda merekelik baǵdarlama saǵat 16.00-den 18.00-ge deıin jalǵasyp, kórermender úshin shaıbaly hokkeıden sheberlik synyby, júldeli sporttyq estafetalar men kontserttik baǵdarlama uıymdastyryldy.
Esterińizge sala keteıik, atalmysh oryndarda sol sııaqty syrǵanaqtar, syrǵanaıtyn zattar men konkılerdi jalǵa alý, syrǵanaý alańdary, fotoaımaqtar jáne t.b. bar.
Elorda ákimdigi jańa jyldyq kóńil kúıge bólenip, qysqy demalysty qaı jerde kóńildi ótkizýge bolatyny týraly habarlaǵan bolatyn.