Konkýrdan Qazaqstan quramasy Tashkenttegi týrnırde 3 altyn medal jeńip aldy
ASTANA. KAZINFORM – Tashkent qalasynda (Ózbekstan) ótip jatqan halyqaralyq at sporty týrnırinde Qazaqstan quramasy úsh altyn medal jeńip aldy.
Dene shynyqtyrý jáne sport isteri komıtetiniń málimetinshe, Oleg Sokolenko Shenanigan atty tulparymen kedergiler bıiktigi 125 sm bolatyn baǵytta jeńiske jetip, ulttyq quramanyń qorjynyna úshinshi altyndy saldy.
Buǵan deıin jarystyń alǵashqy kúni Bekjan Baıjanuly King Diamond tulparymen 120 sm kedergiler baǵytynda, al Ksenııa Batalova Lady Di tulparymen 140 sm baǵytta top jarǵan.
Sonymen qatar Oleg Sokolenko Tashkenttegi jarysta bir kúmis jáne bir qola medal jeńip alǵan. 24 sáýirde 140 sm kedergiler baǵytynda (Álem kýbogy men Gran-prı kezeńine irikteý) Cinderella tulparymen ekinshi oryn alsa, 120 sm baǵytta Shenanigan-men úshinshi bolyp márege jetken.
Taǵy bir qola júldeni Nurıla Turysbekova Quibelle van D’abelendreef tulparymen jeńip aldy.
Qazirgi ýaqytta Qazaqstan quramasynyń qorjynynda 3 altyn, 1 kúmis jáne 2 qola medal bar. Týrnır 26 sáýirde aıaqtalady.
Alda komanda FEI Jumping World Cup Grand Prix Eurasian League kezeńinde baq synaıdy. Bul jarysta sportshylar kedergiler bıiktigi 155 sm-ge deıingi baǵytta synǵa túsedi.
Aıta keteıik, buǵan deıin Qazaqstanda 2026 jyly at sporty boıynsha úsh halyqaralyq týrnır ótkizý josparlanyp otyrǵany habarlanǵan.
