Konkımen júgirýden Qazaqstan quramasynyń bas bapkeri Aleksandr Klenkomen bolǵan jaǵdaıdy túsindirdi
ASTANA. KAZINFORM – QR konkımen júgirý sportynan Ulttyq quramanyń bas bapkeri Aleksandr Panfılov qostanaılyq sportshy Aleksandr Klenkomen bolǵan jaǵdaıdy túsindirdi.
Budan buryn habarlanǵandaı, Aleksandr Klenko men konkımen júgirý sportynan ulttyq qurama arasynda Azııa oıyndary-2025 komandasyn jasaqtaý máselesine qatysty kelispeýshilik Astanadaǵy irikteý týrynan keıin paıda boldy.
Aleksandr Klenkonyń aıtýynsha, sportshylarǵa Qazaqstan chempıonatynyń nátıjesine sáıkes 2025 jylǵy Azııa oıyndaryna baratyn komanda qurylatyny aıtylǵan.
Alaıda jarys qorytyndysy boıynsha qashyqtyǵyn (1500 metr) júgirip ótip, ekinshi oryn alǵan qostanaılyq sportshy ózin tizimnen kórmegen. Klenkony oblystyq Sport basqarmasy qoldap, QR Týrızm jáne sport mınıstrligine hat joldady.
Kazinform da QR Týrızm jáne sport mınıstrligine saýal joldady.
QR konkımen júgirý sportynan ulttyq quramanyń bas bapkeri Aleksandr Panfılov qostanaılyq sportshymen bolǵan jaǵdaıǵa qatysty pikir bildirdi. Onyń aıtýynsha, Azııa oıyndary sııaqty halyqaralyq jarystarǵa komanda qurý kezinde kóptegen krıterıı eskeriledi: sporttaǵy kórsetkishteri, sportshylardyń fızıkalyq jaǵdaıy, olardyń mamandanýy, jattyqtyrýshylar shtabynyń usynysy, sondaı-aq komandanyń óner kórsetý strategııasy.
- Bul sheshim jalpy maqsattardy eskere otyryp, tek komandanyń múddesi úshin qabyldandy, - dep sendirdi ol.
Aleksandr Panfılov jattyqtyrýshylar shtaby federatsııamen birlesip basym qashyqtyqtardy belgilegenin, onda bizdiń sportshylardyń medal jeńip alý múmkindigi joǵary ekenin atap ótti. Qatysýshylar arasyndaǵy kelisimdi talap etetin 8 aınalymnan turatyn komandalyq jarysqa stavka jasaldy.
- 10 sportshynyń ishinen eń tıimdi komandany tańdaý kerek boldy. Qatysý kvotasy shekteýli boldy – el boıynsha 10 er adam men 10 áıel. Bul talap kúrdeli sheshim qabyldaýǵa májbúr etedi, - dedi bas jattyqtyrýshy.
Onyń aıtýynsha, QR UOK-ǵa ataýly ótinimderdi berý merzimi 1 jeltoqsanǵa deıin belgilengen. Sonymen qatar Qazaqstan chempıonaty 18-21 jeltoqsan aralyǵynda ótti.
Ol komandanyń quramy týraly sheshimdi jattyqtyrýshylar shtaby sportshylardyń qazirgi jaǵdaıyn jáne olardyń negizgi qashyqtyqtarda óner kórsetýge daıyndyǵyn taldaý negizinde qabyldaǵanyn atap ótti.
- Aleksandr ulttyq komandanyń mańyzdy bóligi bolyp qala beredi jáne ol mansabyn jalǵastyryp, bizdi jańa jetistikterimen qýantady dep úmittenemiz, - dedi bas bapker.
Konkımen júgirý sportynan Qazaqstan komandasynyń jańa maýsymdaǵy quramy jarııalanǵanyn jazǵan bolatynbyz.