Konkı: Almatyda Qazaqstan Kýbogynyń sheshýshi kezeńi aıaqtaldy

ASTANA. KAZINFORM – 20-21 aqpan aralyǵynda Almaty qalasyndaǵy «Medeý» muzaıdynynda konkımen júgirýden Qazaqstan Kýbogynyń sońǵy kezeńi ótti.

Sportty damytý dırektsııasynyń baspasóz qyzmeti málim etkendeı, maýsymnyń sheshýshi jarysyna elimizdiń 6 oblysy men iri qalalardan (Almaty, Astana qalasy; Abaı, Qaraǵandy, Qostanaı, Pavlodar, SQO men ShQO) 160 sportshy qatysty. 

Bul qatarda Ulttyq qurama sapynda halyqaralyq týrnırlerde júlde alyp júrgen Nuraly Aqjol, Baqdáýlet Saǵatov, Darıa Gavrılova, Krıstına, Alına jáne Inessa Shýmekovalar bar. 

Atalǵan jarysta áıelder arasynda 500 metr qashyqtyqta bas júldeni Margarıta Artemeva (40,94 sekýnd) jeńip aldy. Osy qashyqtyqta erlerden Altaı Járdembekuly (36,14 sekýnd) bas júldeni qanjyǵasyna baılady.

1500 metrden áıelder arasynda Dıana Bachýrına (2,14,75 sekýnd) chempıon atansa, erler arasynda Baqdáýlet Saǵatov (1,55,66 sekýnd) jeńis tuǵyrynyń eń bıik satysyna kóterildi.

1000 metr qashyqtyqty qyzdar arasynda Anastasııa Belovodova (1,23,65 sekýnd) birinshi bolyp baǵyndyrsa, erlerden Aleksandr Klenkoǵa (1,12,54 sekýnd) teń keler eshkim bolǵan joq.

3000 metrge konkımen júgirýden áıelder arasynda birinshi oryndy Dıana Bachýrına (4,59,06) jeńip alsa, erlerden 5000 metr qashyqtyqta Nuraly Aqjol (7,35,11) chempıon atandy.

Endi 22-23 aqpanda komandalyq Qazaqstan chempıonaty ótedi.