Qońqabaev «Astana arlandarynyń» jeńisin nyǵaıta tústi
ASTANA. QazAqparat - «Astana arlandarynyń» sapyndaǵy salmaǵy eń aýyr boksshy Qamshybek Qońqabaev brıtandyq qarsylasy Solomon Dekresten basym tústi. Osylaısha, brıtandyq «British Lionhearts» komandasyn 7:3 esebimen utqan qazaq boksshylary fınalǵa joldama alyp otyr, dep habarlaıdy QazAqparat tilshisi.
Aýyr salmaqtaǵy boksshylardyń aıqasy birshama qaýipti sáttermen este qaldy. Brıtandyq Dekrestiń qımyly shıraq kóringenimen, soqqy jaǵynan Qamshybek dáldikti tanyta bildi. Aqyry tóreshiler biraýyzdan jeńisti Qamshybek Qońqabaevqa berdi.
Aıta ketsek, Atyraýda ótken búgingi boks keshindegi alǵashqy kezdesý (52 keli salmaqta Sáken Bıbosynov pen Ýıl Kaýleı arasyndaǵy aıqas) «British Lionhearts» komandanyń enshisinde ketken bolatyn.
Alaıda qazaq boksshylary bir jeńilistiń esesin eki jeńispen qaıtardy. Naqtyraq aıtqanda, Serik Temirjanov Kalým Frenchten (60 keli salmaqta) basym tússe, ekinshi kezdesýde brıtandyq Karl Feıldi qadaý-qadaý soqqylarynyń astyna alǵan Asylanbek Shyńbergenov (69 keli) jeńiske óz komandasyn bir qadam jaqyndata tústi.
Budan keıin 81 kelidegi salmaqta Bek Nurmaǵanbet Lırıdýn Hýnany aıqyn basymdyqpen utty. Úshinshi raýndta Ulybrıtanııanyń atynan shyqqan shved legıoneri Hýna bir márte nogdaýnǵa túsip qalǵanymen, aıqastyń sońyna deıin shydap baqty. Osylaısha, Bek Nurmaǵambettiń jeńisi «Astana arlandaryn» 6:3 esebimen Búkilálemdik boks serııasynyń fınalyna shyǵardy.
Eske sala ketsek, Búkilálemdik boks serııasynyń jartylaı fınalyndaǵy «Astana Arlans» pen «British Lionhearts» komandalary arasyndaǵy alǵashqy kezdesýde otandastarymyz jeńiske jetken bolatyn. Jartylaı fınaldyq kezeńniń alǵashqy aıqasyn syrt alańda, ıaǵnı Ulybrıtanııanyń Sheffıld qalasynda ótkizgen jerlesterimiz jergilikti boksshylardy 3:2 esebimen utyp, fınalǵa bir taban jaqyndaı túsken.
Búgingi kezdesýde jeńiske jetken qazaq boksshylary fınalda kýbalyqtarmen nemese frantsýzdarmen (ekeýiniń arasyndaǵy aıqastyń jeńimpazymen) kezdesedi.
