Qonysbek Tókenov: Armanym — Olımpıada chempıonyn baptap shyǵarý

ASTANA. KAZINFORM — Grek-rım kúresinen Qazaqstan ulttyq quramasynyń bas bapkeri Qonysbek Tókenov Horvatııa astanasy Zagreb qalasynda ótken álem chempıonatyn qorytyndylady.

Bas bapker álem chempıonatynda alǵa qoıǵan maqsatyn oryndaǵanyn aıtty. Sondaı-aq, alda Olımpıada oıyndary kele jatqanyn eske saldy.

— Olımpıada armanymyz ǵoı, maqsatyma jetkim keledi. Kádetter jáne jastar arasynda álem chempıony bar. Álem chempıonatyndaǵy basty maqsatymyz eresekter arasynda altyn medal jeńip alý edi. Sol maqsatymyzǵa jettik. Alda 2028 jylǵy Olımpıada oıyndary kele jatyr. Armanym — Olımpıada chempıonyn baptap shyǵarý, — dedi ol.

Qonysbek Tókenov fınaldyq beldesýdi eske alyp, qarsylasqa tyńǵylyqty daıyndalǵanyn aıtty.

— Aıdosty arnaıy Áset Imanbaev jeke jattyqtyrdy. Al biz syrttaı barlyq jaǵdaıdy istep júrdik. Ózbek balýanyna arnaıy taktıka daıyndadyq, basynan óziniń erekshe ádisterin qoldaný týraly tapsyrdyq. Negizi 6 mınýt kúresýge daıyndalǵan edik. Aıdosymyz erlep bir jarym mınýtta jeńisti qanjyǵalady, — dedi bapker.

Sońynda, bas bapker shákirtiniń jeńisten keıin emotsııany ishte ustaǵanyn, elge kelip aıryqsha qýanyshty sezimge bólenip jatqanyn jasyrmady.

Aıta keteıik, Prezıdent grek-rım kúresinen álem chempıony Aıdos Sultanǵalıdy quttyqtady.

Álem chempıony Aıdos Sultanǵalı búgin elordaǵa oraldy.

Osyǵan deıin habarlaǵanymyzdaı, Aıdos Sultanǵalı Qazaqstan tarıhynda grek-rım kúresinen 26 jyldan keıin álem chempıonatynda altyn aldy.