Qonys aýdarýǵa qolaıly óńirdi tańdaýǵa arnalǵan ınteraktıvti karta iske qosyldy
ASTANA. KAZINFORM – Erikti túrde qonys aýdarý múmkindigin qarastyryp júrgen Qazaqstan azamattary migration.enbek.kz portalyndaǵy ınteraktıvti kartany paıdalana alady.
Jańa tsıfrlyq servıs yńǵaıly formatta qonystandyrý óńirleri, qonys aýdarý sharttary, jumysqa ornalasý múmkindikteri jáne memlekettik qoldaý sharalary týraly ózekti aqparatpen tanysýǵa múmkindik beredi.
Interaktıvti karta azamattarǵa kóshý jaǵdaılaryn aldyn ala baǵalap, óńirdi tańdaý týraly negizdelgen sheshim qabyldaýǵa kómektesý maqsatynda ázirlengen. Paıdalanýshy qyzyǵýshylyq tanytqan óńirdi tańdap, bos jumys oryndary, suranysqa ıe mamandyqtar, qonys aýdarýshylardy qabyldaıtyn eldi mekender, sondaı-aq usynylatyn memlekettik qoldaý sharalary týraly aqparat ala alady.
Kartanyń negizgi bólimderiniń biri — suranysqa ıe mamandyqtar týraly aqparat. Óńirlik eńbek naryǵynyń qajettilikterimen aldyn ala tanysý áleýetti qatysýshylarǵa qonys aýdarǵanǵa deıin jumysqa ornalasý perspektıvalaryn baǵalaýǵa jáne óz mamandyǵy, tájirıbesi men kásibı daǵdylaryn eskere otyryp, óńirdi tańdaýǵa múmkindik beredi.
Qonystandyrý óńirlerinde ekonomıkanyń túrli salalarynyń mamandaryna suranys bar. Atap aıtqanda, mynadaı mamandarǵa qajettilik saqtalýda:
- dárigerler, medıtsınalyq meıirgerler jáne basqa da medıtsına qyzmetkerleri;
- muǵalimder, mektepke deıingi jáne orta bilim berý pedagogteri;
- túrli baǵyttaǵy ınjenerler;
- agronomdar, veterınarııalyq dárigerler jáne aýyl sharýashylyǵy salasynyń basqa da mamandary;
- mehanızatorlar, traktorshylar jáne júrgizýshiler;
- elektrmonterler, elektrıkter, dánekerleýshiler, tokarlar jáne basqa da jumysshy mamandyqtarynyń ókilderi;
- qurylysshylar, tas qalaýshylar, betonshylar, montajshylar jáne árleýshiler;
- býhgalterler, ekonomıster, sondaı-aq memlekettik jáne áleýmettik qyzmet kórsetý salasynyń mamandary.
Bul rette suranysqa ıe mamandyqtar tizbesi óńirlik eńbek naryqtarynyń aǵymdaǵy qajettilikterin eskere otyryp, turaqty túrde jańartylyp otyrady. Bul paıdalanýshylarǵa naqty óńirde jumysqa ornalasý múmkindigi bar baǵyttar boıynsha neǵurlym ózekti aqparat alýǵa múmkindik beredi.
Bos jumys oryndary men mamandyqtar týraly aqparattan bólek, ınteraktıvti kartada qonys aýdarýshylardy qabyldaıtyn eldi mekender, áleýmettik ınfraqurylym nysandary, qoljetimdi memlekettik qoldaý sharalary jáne konsýltatsııa alý úshin baılanys derekteri týraly málimetter qamtylǵan. Osylaısha, azamattar tek jumysqa ornalasý perspektıvalaryn ǵana emes, tańdalǵan eldi mekendegi ómir súrý jaǵdaılaryn da baǵalaı alady.f
Barlyq qajetti aqparattyń bir tsıfrlyq servıste jınaqtalýy kóshýge daıyndyq protsesin túsinikti, ashyq ári yńǵaıly etedi. Paıdalanýshyǵa bos jumys oryndary, ınfraqurylym jáne qoldaý sharalary týraly málimetterdi ártúrli derekkózderden óz betinshe izdeýdiń qajeti joq — negizgi aqparat tikeleı kartada qoljetimdi.
migration.enbek.kz portalyndaǵy osyndaı tsıfrlyq servısterdi damytý erikti túrde qonys aýdarý múmkindikteri týraly aqparattyń qoljetimdiligin arttyrýǵa, azamattarǵa kóshý protsesin aldyn ala josparlaýǵa jáne kásibı ári ómirlik qajettilikterin eskere otyryp, negizdelgen sheshim qabyldaýǵa múmkindik beredi.
Barlyq qyzyǵýshylyq tanytqan azamattardy migration.enbek.kz portalyndaǵy qonys aýdarýdyń ınteraktıvti kartasyn paıdalanýǵa, qonystandyrý óńirlerindegi jumysqa ornalasý múmkindikterimen, suranysqa ıe mamandyqtarmen jáne turý jaǵdaılarymen tanysýǵa, sondaı-aq odan ári turý jáne eńbek qyzmetin júzege asyrý úshin ózine neǵurlym qolaıly óńirdi tańdaýǵa shaqyramyz.
Aıta ketelik SQO-ǵa jyl basynan beri 690 otbasy qonys aýdardy.
