Qonys aýdarý jáne jumysqa ornalasý múmkindigin endi onlaın baǵalaýǵa bolady
ASTANA. KAZINFORM — migration.enbek.kz portalynda erikti qonys aýdarý múmkindigin qarastyryp júrgen azamattarǵa arnalǵan jańa tsıfrlyq servıs iske qosyldy, dep habarlaıdy Eńbek jáne halyqty áleýmettik qorǵaý mınıstrliginiń baspasóz qyzmeti.
Platforma qonystandyrý óńirlerindegi qabyldaý sharttarymen tanysýǵa, sondaı-aq resmı jumysqa ornalasýǵa suranysqa ıe mamandyqtardyń ózekti tizimin kórýge múmkindik beredi.
Paıdalanýshylar ózderin qyzyqtyratyn óńirdi tańdap, sol aımaqtaǵy bos jumys oryndary, memlekettik qoldaý sharalary, turǵyn úı jaǵdaılary jáne baǵdarlamaǵa qatysýshylarǵa usynylatyn ózge de múmkindikter týraly aqparatty birden ala alady.
Portalda suranysqa ıe mamandyqtar tizimine erekshe nazar aýdarylǵan. Bul azamattarǵa qonys aýdarmas buryn eńbek naryǵyndaǵy óz múmkindikterin aldyn ala baǵalaýǵa jol ashady. Búginde eń suranysqa ıe mamandyqtardyń qatarynda:
- Densaýlyq saqtaý — dárigerler, meıirgerler jáne ózge de medıtsına qyzmetkerleri;
- Bilim berý — muǵalimder, mektepke deıingi jáne orta bilim berý pedagogteri;
- Injenerlik-tehnıkalyq baǵyt — túrli tehnıkalyq mamandyq ıeleri;
- Aýyl sharýashylyǵy — agronomdar, veterınarlar jáne salalyq mamandar;
- Kólik — mehanızatorlar, traktorshylar jáne júrgizýshiler;
- Jumysshy mamandyqtary — elektr monterleri, elektr mamandary, dánekerleýshiler, tokarlar;
- Qurylys — tas qalaýshylar, betonshylar, montajshylar jáne árleýshiler;
- Basqarý jáne áleýmettik sala — býhgalterler, ekonomıster, memlekettik jáne áleýmettik qyzmet kórsetý salasynyń mamandary.
Atalǵan tizim óńirlik eńbek naryqtarynyń suranysyna sáıkes turaqty túrde jańartylyp otyrady. Bul paıdalanýshylarǵa ózekti ári senimdi aqparat alýǵa, óz múmkindikterin aldyn ala baǵalap, kásibı daǵdylary joǵary suranysqa ıe bolatyn óńirdi tańdaýǵa múmkindik beredi.
— Servıstiń ınteraktıvti kartasynda eldi mekender, áleýmettik nysandar, ınfraqurylym jáne keńes alýǵa arnalǵan baılanys derekteri týraly málimetter de ornalastyrylǵan. Bul qonys aýdarýdy josparlaý úderisin barynsha ashyq ári túsinikti etedi. migration.enbek.kz portalyndaǵy tsıfrlyq servısterdi damytý memlekettik qoldaý sharalarynyń qoljetimdiligin arttyrýǵa jáne azamattarǵa turǵylyqty jerin ózgertýge qatysty sanaly ári negizdelgen sheshim qabyldaýǵa kómektesýge baǵyttalǵan, — delingen vedomstvo habarlamasynda.
Eske salsaq, QR Úkimeti 2026 jylǵa arnalǵan erikti qonys aýdarý óńirleri retinde Abaı, Shyǵys Qazaqstan, Qaraǵandy, Qostanaı, Pavlodar, Soltústik Qazaqstan jáne Ulytaý oblystaryn aıqyndady.
Osyǵan deıin SQO-ǵa qonys aýdarǵan fermerler jeńildikpen berilgen nesıeni qaıtarmasa sotqa tartylýy múmkin ekenin jazǵanbyz.
