Qonys aýdarǵandarǵa beriletin turǵyn úı sertıfıkaty 7 mln teńgege jetti

ASTANA. KAZINFORM — 2026 jylǵy 1 qańtardan bastap óńirlik ıpotekalardyń bastapqy jarna sertıfıkaty 2,5 mln teńgege ósedi. Osy ýaqytqa deıin 4 mln 561 myń teńge berilip kelse, 2026 jyly 7 mln 29 myń teńge shamasynda bolady.

Elimizde qonys aýdarýǵa kelisken Qazaqstan azamattaryna ekonomıkalyq mobıldilik sertıfıkaty beriledi. Atalǵan sertıfıkat arqyly qarjylaı kómek alyp turǵyn úı satyp alýǵa bolady.

Eńbek jáne halyqty áleýmettik qorǵaý mınıstrligi Májilis depýtatynyń saýalyna joldaǵan jaýapta ishki kóshi-qondy retteýge arnalǵan ıpotekalyq baǵdarlamaǵa ózgeris engiziletinin málim etti.

— Aýyldyq eldi mekenderde turǵyn úı satyp alý úshin ekonomıkalyq mobıldik sertıfıkaty (budan ári — EMS) nemese oblystyq jáne aýdandyq mańyzy bar qalalarda turǵyn úı satyp alý kezinde ıpotekalyq turǵyn úı qaryzdary boıynsha bastapqy jarna engizildi. Bıylǵy turǵyn úı naryǵyn taldaý nátıjelerin eskere otyryp, onyń mólsheri 1 160 AEK-ten (1 160×3 932=4 mln 561 myń teńge — red.) 1 625 AEK-ke (1 625×4 325=7 mln 29 myń teńge — red.) deıin ulǵaıtyldy, — delingen habarlamada.

Bul ózgeris 2026 jyldyń 1 qańtarynan bastap kúshine enedi.

Aıta keteıik, Qazaqstanda qandastar men qonys aýdarýshylarǵa ómir súrý jaǵdaıyn jaqsartýǵa jáne jańa óńirlerge beıimdelýine baǵyttalǵan memlekettik qoldaý sharalary qarastyrylǵan.

Qonys aýdarýshylar úshin kelesi qoldaý sharalary qarastyrylǵan:

• turǵyn úı satyp alý, salý nemese ıpotekalyq qaryzdy jabý úshin bir rettik aqshalaı kómek;

• kóship kelý, turǵyn úıdi jalǵa alý jáne kommýnaldyq qyzmetterdi tóleý shyǵyndaryn óteý;

• jańa mekende jumysqa ornalasýǵa jáne kásipkerlikpen aınalysýǵa járdemdesý;

• jumys berýshiniń suranysy bolǵan jaǵdaıda kásibı oqytý.

2026 jylǵa arnalǵan tólemder kólemi tómendegideı bolady:

• kóship kelý úshin — 70 AEK (ár otbasy múshesine 302 750 teńge);

• turǵyn úıdi jalǵa alý jáne kommýnaldyq qyzmetter — 15–30 AEK aralyǵynda (aı saıyn 12 aı boıy, otbasy quramy men ornalasqan jerine baılanysty);

• ekonomıkalyq mobıldik sertıfıkaty — 2025 jyly 1160 AEK (4 561 120 teńge) bolsa, 2026 jyly 1 625 AEK (7 mln 29 myń teńge) tólenedi, bul turǵyn úıdiń qunynyń 50%-yn jabady. Qalǵan somany qonys aýdarýshy ózi tóleýi qajet.

SQO ákimdiginiń ishki saıasat basqarmasynyń málimetinshe, óńirde naqty jumysqa ornalasý múmkindikteri bar. 2025 jyldyń tamyz aıyndaǵy jaǵdaı boıynsha Soltústik Qazaqstan oblysy aýdandarynda 881 bos jumys orny ashyq ekeni habarlandy.