Qońyraýlardy mindetti túrde tańbalaý nelikten keıinge shegerildi
ASTANA. KAZINFORM — Zańdy tulǵalardan keletin qońyraýlardy mindetti túrde tańbalaý engizý kelesi jylǵa qalýy múmkin. Bul týraly Jasandy ıntellekt jáne tsıfrlyq damý mınıstrligi Telekommýnıkatsııa komıtetiniń tóraǵasy Damır Seısenbaev aıtty.
Úkimet otyrysynan keıingi baspasóz máslıhatynda BAQ ókilderi odan «Buǵan deıin Qazaqstanda kúzden bastap zańdy tulǵalardan keletin qońyraýlardy tańbalaý engiziletini belgili bolǵan edi. Bul talap naqty qashan kúshine enedi jáne baılanys operatorlarymen kelisimge qol jetkizildi me? Olardyń barlyǵy bul bastamamen kelisti me?» dep suraǵan edi.
Saýalǵa jaýap bergen komıtet tóraǵasynyń aıtýynsha, resmı qońyraýlardy mindetti túrde tańbalaýdy kózdeıtin zańnamalyq ózgerister qabyldandy. Osy túzetýlerdiń birqatary qazirdiń ózinde kúshine endi.
— Qazirgi ýaqytta mınıstrlik (Tsıfrlyq damý mınıstrligi) Baılanys qyzmetterin kórsetý qaǵıdalaryn ázirlep, ol tıisti kelisý rásiminen ótip jatyr. Osy qaǵıdalarda bul júıeniń qalaı jumys isteýi kerektigine qatysty naqty talaptar, sondaı-aq tehnıkalyq máseleler aıqyndalady. Bizge operatorlardan resmı ótinish kelip tústi. Olar bul júıeni 2027 jyldyń birinshi toqsanynan bastap engizýdi surady. Qazir bul máseleni qarastyryp jatyrmyz. Qalaı bolǵanda da, bızneske qosymsha salmaq túsirmeý úshin bul usynysty oń turǵyda qarastyramyz dep oılaımyn. Menińshe, qazan aıynyń ortasyna deıin mınıstrdiń tıisti buıryǵyna qol qoıylyp, onda naqty merzimder kórsetiledi, — dedi Damır Seısenbaev.
Buǵan deıin abonentter endi bank, memlekettik organ jáne qyzmet kórsetýshi kompanııalardan túsetin resmı qońyraýlardy birden ajyratý múmkindigin alatynyn jazǵan edik.
