Kóńilsiz adamnyń túrin kúlimsiretip kórsetetin aına
ASTANA. 19 jeltoqsan. QazAqparat - Tokıo ýnıversıtetiniń ónertapqyshtary árbir tańdy qaıyrly etýdiń tyń tásilin tapty.
Oqý ornynda ornatylǵan elektrondy sharaına kóńil-kúıi buzylǵan adamnyń túrin kúlimsiretip kórsetedi. Qurylǵynyń orta tusynda adam beınesin shaǵylystyratyn qabattyń ornynda monıtor men kamera bar. Osy quraldar qaraǵan adamnyń beınesin kóńildi etip, shyraılandyrady. Teńdessiz qurylyǵyny jasaǵandardyń oıynsha, ony kúndelikti ómirde de qoldanýǵa bolady. Olar jaıdary aınany kúızeliske ushyraǵan adamdarǵa kómektesý úshin paıdalanýǵa da bolatyndyǵyn aıtty, dep habarlady 24.kz.
«Kompıýterlik baǵdarlama adamnyń túr-álpetin ózgertip, júzine kúlki uıalatyp, bet shyraıyn jandy qylyp, túrlendirip kórsetedi. Adam óziniń kúlimsiregen túrin kórip, ózin baqytty sezine bastaıdy», - dedi Tokıo ýnıversıtetiniń professory Mıhıtaka Hırose.
