Kóńilge medeý, úmitke qanat bitirgen úndeý boldy – Erjan qajy Malǵajyuly

NUR-SULTAN. QazAqparat – Koronavırýsqa baılanysty búgingi kúnniń mańyzdy máseleleri der kezinde oń sheshimin tapsa, alǵystan basqa aıtarymyz qalmas edi. «Nur-Múbarak» ýnıversıteti rektorynyń keńesshisi, Qazaqstan musylmandary dinı basqarmasy Ǵulamalar keńesiniń múshesi Erjan qajy Malǵajyuly Prezıdent Qasym-Jomart Toqaevtyń teleúndeýine qatysty osyndaı pikir bildirdi, dep habarlaıdy QazAqparat.

«Memleket basshysy Qasym-Jomart Toqaevtyń telearna arqyly halyqqa joldaǵan úndeýin tyńdadym. Juqpaly indet saldarynan jaqynynan aıyrylǵan jurtymyz úshin, dertke daýa tappaı eleń-alań kúı keshken elimiz úshin bul kóńilge medeý, janǵa jiger, úmitke qanat bitirgen úndeý boldy.

Dál qazir dárihanalarda dári-dármek tapshylyǵy baıqalady. «Ashynǵannan shyǵar aşy daýysym» degendeı, bul máseleni halyq áleýmettik jelide jıi kóterdi, aşy daýysyn jetkizdi. Osy rette Prezıdent óz sózinde: «Qazir memlekettik organdar eldi mekenderdi qajetti dári dármekpen tolyq qamtamasyz etýde. Osyǵan oraı, tıisti qor jasaqtalǵan. Tósek oryndary da, medıtsınalyq qyzmet kórsetý isi de tolyǵymen qamtamasyz etiledi» dep atap ótti. Rasynda, bul – búgingi kúnniń mańyzdy máselesi. Atalǵan jaǵdaı der kezinde oń sheshimin tapsa, bizdiń alǵystan basqa aıtarymyz qalmas edi...», - deıdi E.Malǵajyuly.

Onyń aıtýynsha, elimizdiń Bas múftıi Naýryzbaı qajy Taǵanuly da jamaǵatqa joldaǵan úndeýinde osy máselege aıryqsha toqtalǵan bolatyn.

«Bas múftıdiń: «Asyl dinimizde qajet ýaqytta qajet kómekti jasaý úlken saýapty amaldyń birine jatady. Syndarly sátte naýqas jandarǵa qajetti dári-dármekti jetkizip, alǵysyn alaıyq. Dári-dármektiń baǵasyn qoldan qymbattatýǵa jol bermeı, jaqsylyq jasaýǵa asyǵaıyq» degen sóziniń jany bar.

Al Memleket basshysy dári-dármektiń baǵasyn birneshe ese ósirip, qalyptasqan jaǵdaıdy óz maqsatyna paıdalanǵysy kelgen alypsatarlarǵa tıisti jaza beriletinin jetkizdi. Solar synaq sátinde adamnan aqsha emes, alǵys alýdyń qanshalyqty saýapty is ekenin bilse, túsinse eken deısiń.

Q.Toqaev kúrdeli jaǵdaı kezinde el arasynda kóptegen jalǵan áńgimeler tarap jatqanyn, sonymen qatar sol teris aqparat taratyp júrgen aram pıǵyldy adamdardyń áreketterin synǵa aldy. Rasynda da teris aqparat taratý zań men sharıǵatty bylaı qoıǵanda adamgershilikke jat áreket qoı.

Alla Taǵala Quranda: «Áı múminder! Buzyq bireý habar keltirse, ony anyqtańdar. Áıtpese bilmeı bir elge kesirleriń tıip, istegenderińe ókinesińder» deıdi («Hýjýrat» súresi, 6-aıat).

Osy rette halyqty úreıge emes, úmitine qanat bitirýge, qaıǵyǵa emes, qýanyshqa bóleýge shaqyramyz. Elimiz aman, jurtymyz tynysh bolǵaı. Osy synaqty sabyrmen eńserip, jaqsy kúnde jolyǵýdy jazǵaı. Ámın!», - deıdi ol.