Kóńildi ári sezimge toly bolady - Dımash Máskeýdegi ekinshi kontsertine shaqyrdy

ALMATY. QazAqparat – Qazaqstandyq ánshi Dımash Qudaıbergen Máskeýde ekinshi kontsert beredi, dep habarlaıdy QazAqparat tilshisi.

Bul týraly ol óziniń Instagram jelisindegi paraqshasynda jazdy.

«Qymbatty dostar! Sizderdi qýana-qýana Máskeýde, 2020 jyly 9 naýryzda «Megasport» arenasynda ótetin ózimniń kontsertime shaqyramyn. Bul kóńildi, kreatıvti jáne sezimge toly bolady! Sizderdi kóktemniń alǵashqy merekelik kúnderi Máskeýde bolatyn ózimniń shoýyma shaqyramyn. Bıletter Reseı boıynsha týrnedegi bıletterdi resmı satýmen aınalysatyn áriptes - www.icetickets.ru» saıtynda»,-delingen ánshiniń jazbasynda.

Budan basqa Dımash ekinshi kontsertiniń sansyz tyńdarmandarynyń suranysy boıynsha ótetindigin ataı ketken.

Eske sala ketsek, Máskeýde 22 naýryzda Kreml saraıynda Dımash Qudaıbergenniń birinshi jeke kontserti ótken edi. Oǵan ánshiniń shyǵarmashylyǵyna shynaıy berilgen álemniń 50-den astam elinen jankúıerler kelgen bolatyn.

Sondaı-aq Dımash budan buryn 25 naýryz kúni Praganyń «Tipsport-Arena»-synda ótetin Chehııadaǵy alǵashqy jeke kontsertine de shaqyrǵan edi.