Kóńildesine bergen 2 mln teńgeni jasyrý úshin polıtsııaǵa aryzdanǵan áıel ustaldy
TÚRKІSTAN OBLYSY. QazAqparat –Saıram aýdanynda turatyn kelinshek polıtsııaǵa ózin tonap ketti dep jalǵan habar bergen. Ol kóńildesine bergen 2 mln teńgeniń ornyn kúıeýinen jasyrý úshin osyndaı qadamǵa barǵan, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, jábirlenýshi oqıǵa ornyna jetken jedel-tergeý tobynyń qyzmetkerlerine tonaý qylmysy qalaı jasalǵanyn aıtyp bergen. Onyń sózinshe, betine betperde kıgen belgisiz tulǵa úıine kirip ony baılap tastaǵan. Sóıtip pyshaqpen qorqytyp, eki mıllıon teńge aqshasyn alyp ketkenin aıtqan.
Alaıda atalǵan qylmysty ashý maqsatynda qajetti jedel-izdestirý is-sharalaryn júrizgen jedel ýákilder oqıǵa ornynan tonaýdyń eshqandaı naqty izderin tappaǵan, Sosyn bul qylmystyń jasalǵany jalǵan degen boljam jasady. Jaýap alý barysynda jábirlenýshi polıtsııaǵa jalǵan aqparat bergenin moıyndaǵan.
«Tereý barysynda saıramdyq kelinshektiń kúıeýinen jasyryp, kóńildesine jıi aqsha berip otyrǵany anyqtalǵany. Nátıjesinde ol eki mıllıon teńge jumsap qoıyp, aqshanyń jetispeýshiligin jasyrýǵa tyrysqan. Sodan keıin, súıiktisi ekeýi jospar quryp, «tonap ketti» dep jalǵan aqparat berýdi sheshken. Osylaısha, kóńildes jigit jospardy oryndaý úshin jábirlenýshi áıeldi baılap, kózinen urǵan. Al, kúıeýi úıge kelgende, áıel oǵan tonaýshylardyń shabýyl jasaǵanyn aıtyp, polıtsııaǵa aryz túsirgen» delingen habarlamada.
Qazirgi ýaqytta atalǵan jaıt boıynsha QR QK 419-baby «Kórineý jalǵan sóz jetkizý» boıynsha sotqa deıingi tergeý amaldary júrgizilýde.
