Kongrestiń eki palatasy «Djekson-Venık» zańynyń kúshin joıý týraly zań jobalaryn engizdi
ASTANA. KAZINFORM – Senatorlar men kongressmender AQSh Senaty men Ókilder palatasynda «PNTR»-dyń Ortalyq Azııa elderimen turaqty qalypty saýda qatynastary mártebesin ornatý týraly eki birdeı zań jobasyn usyndy, dep habarlaıdy Kazinform menshikti tilshisi.
AQSh senatory Stıv Deıns (Montana shtatynan respýblıkashyl) AQSh Senaty Qurama Shtattar men Ortalyq Azııa arasyndaǵy yntymaqtastyqtyń on jyldyǵyna arnalǵan qararyn keshe keshke qabyldaǵanyn jarııalady. Qarardyń teń avtorlarynyń qatarynda senatorlar Gerı Pıters (Mıchıgan shtatynan demokrat), Djım Rısh (Aıdaho shtatynan respýblıkashyl), Krıs Merfı (Konnektıkýt shtatynan demokrat), Devıd Makkormık (Pensılvanııa shtatynan respýblıkashyl) jáne Djekı Rozen (Nevada shtatynan demokrat) bar.
Zań jobasyna «S.3103 – A bill to authorize the extension of nondiscriminatory treatment (normal trade relations treatment) to products of certain countries» — belgili bir elder taýarlaryna kemsitpeıtin rejımniń (qalypty saýda qatynasy rejımi) taralýyna ruqsat beretin ataýy berildi.
— Ortalyq Azııa – strategııalyq mańyzdy aımaq jáne 2015 jyly «C5+1» bastamasy iske qosylǵannan beri biz Amerıka jáne Ortalyq Azııanyń bes eli: Qazaqstan, Qyrǵyzstan, Tájikstan, Túrikmenstan jáne Ózbekstan arasyndaǵy qarym-qatynastardy tereńdetýde aıtarlyqtaı ilgerileýshilikke qol jetkizdik. Men Ortalyq Azııanyń bes eliniń barlyǵyna bardym jáne saýdany keńeıtý jáne ulttyq qaýipsizdikti nyǵaıtý sııaqty ortaq maqsattarymyzdy joǵary baǵalaımyn. C5+1 bastamasynyń 10 jyldyǵyna arnalǵan qararymdy AQSh Senaty qabyldaǵanyna maqtanamyn jáne yntymaqtastyǵymyzdy jalǵastyrýdy asyǵa kútemin, - dep jazdy Stıv Deıns.
Zań jobasyna Ókilder palatasynda kongresmender Kerol Mıller (Batys Vırdjınııadan respýblıkashyl) jáne Djımmı Panetta (Kalıfornııadan demokrat) bastamashy boldy. Qujat «All Information (Except Text) for H.R.5917 — To authorize the extension of nondiscriminatory treatment (normal trade relations treatment) to products of certain countries» —belgili bir elderdiń taýarlaryna kemsitýshiliksiz rejımniń (qalypty saýda qatynasy rejımi) taralýyna ruqsat beretin dep ataldy.
Ortalyq Azııa elderiniń SІM basshylaryn saltanatty qabyldaý barysynda Senattyń halyqaralyq qatynastar komıtetiniń tóraǵasy, senator Djım Rısh «C5+1» tobyndaǵy seriktesterimizben ekonomıkalyq yntymaqtastyqty keńeıtý jolyndaǵy eskirgen kedergilerdi alyp tastaıtyn zań jobasyn engizý úshin osy aptada senator Stıv Deıns jáne basqa da áriptesterine qosylǵanyn habarlady. Bul «Djekson-Venık» túzetýiniń shekteýin joıady.
Buǵan deıin Ortalyq Azııa jáne Kavkaz ınstıtýtynyń tóraǵasy Frederık Starr Tramp «C5+1» sammıtinde «Djekson-Venık» zańynyń kúshi joıylǵanyn jarııalaýy múmkin ekenin aıtty.