Kongress-holl salynady: Semeıde jerge qatysty daý týdy
SEMEI. KAZINFORM — Redaktsııamyzǵa habarlasqan Semeı qalasynyń turǵyny Bahtııar Qabyken óz atyndaǵy jer telimin ákimdiktiń zańsyz alaıyn dep jatqanyn jetkizdi.
Óz sózinde ol jer «memleket muqtajdyǵy úshin» alynǵaly jatqanyn, alaıda shyn máninde bul aýmaqta Kongress-holl syndy kommertsııalyq nysan salynbaq ekendigin alǵa tartty. Kazinform tilshisi osy máselege zertteý júrgizip kórdi.
Muraǵa qalǵan jer
Bahtııar Qabykenniń aıtýynsha, Ótepbaev kóshesi, 47 úı mekenjaıyndaǵy bul jer ata-apasynan muraǵa qalǵan. Jerdiń jalpy aýdany — 0,0770 gektar.
Onyń sózinshe, bul aýmaqta Kongress-holl salynbaqshy.
— Semeı qalasy ákiminiń 2023 jylǵy 30 qazandaǵy № 880 qaýlysyna sáıkes Teatralnaıa, Bazdyrev jáne Moldaǵalıeva kóshelerinde Kongress-holl qurylysy josparlanǵany jazylǵan. Alaıda Úkimettiń 2024 jylǵy 7 qazandaǵy № 825 qaýlysymen bekitilgen Semeı qalasynyń bas josparyna sáıkes bul aýmaqta kópqabatty turǵyn úı salý kózdelgen. Jer kodeksiniń 84-baby 5-tarmaǵynda: «Jer ýchaskesin memlekettik muqtajdyq úshin májbúrlep alyp qoıý kommertsııalyq múddeni, jekelegen adamdardyń nemese ózge de maqsattardy qanaǵattandyrý úshin júzege assa, ol zańsyz sanalady» delingen. Biraq Semeı qalasynyń sáýlet jáne qala qurylysy bólimi muny nazarǵa almaı, bizdi ádeıi shatastyryp otyr. Olar «bas jospardy ázirlegen „NIPI Astanagenplan“ JShS jobalaý barysynda qatelik jibergen» deıdi, — dep Bahtııar Qabyken óz narazylyǵyn bildirdi.
Óz sózinde ol abaimap.kz portalynda jarııalanǵan málimetter de bas josparǵa sáıkes kelmeıtinin alǵa tartty.
— Meni mazalap otyrǵan suraqtar: 2024 jylǵy 7 qazandaǵy № 825 Úkimet qaýlysymen bekitilgen Semeı qalasynyń bas josparynyń derekteri naqty zańdy kúshke ıe me, álde jergilikti qala qurylysy qujattamasy basym bola ma? Semeı qalasynyń Bas josparyndaǵy atalmysh jer telimi ornalasqan jerde qate ketkeni resmı túrde rastaldy ma? Eger jer telimi bas josparǵa sáıkes turǵyn úı aımaǵynda ornalasqan bolsa, ony kommertsııalyq qurylysqa, mysaly, Kongress-holl salýǵa májbúrlep alý qanshalyqty zańdy? Bul saýaldardyń jaýabyn ákimdikten ala almaǵandyqtan sizderge júginip otyrmyn, — deıdi semeılik.
Sot sheshim shyǵarǵan
Osy rette Kazinform tilshisi máseleniń mánisine úńilip kórdi. Eń áýeli qalalyq turǵyn úı qatynastary jáne turǵyn úı ınspektsııasy bólimine saýalhat jiberdik.
— 2022 jyly bólimge memleket muqtajy úshin jerdi alyp qoıý boıynsha tıisti sektordy qura otyryp, memleket muqtajy úshin jer ýchaskesin májbúrlep ıelikten shyǵarý (satyp alý) jónindegi ókilettik berildi. Atalǵan ózgerister Semeı qalasy ákimdiginiń 2022 jylǵy 3 qazandaǵy № 1517 qaýlysymen bekitilgen jáne 2023 jylǵy 6 qańtarda ádilet departamentinde tirkelip, bólimniń erejesine engizilgen. Semeı qalasy ákimdiginiń «Memleket muqtajy úshin jer ýchaskelerin ıelikten shyǵarý (satyp alý) týraly» 2024 jylǵy № 29 qaýlysyna ózgeris engizý týraly» qaýlysyna sáıkes, Láılá Qabykenqyzy Almaǵambetovaǵa tıesili Ótepbaev kóshesi, 47 úı mekenjaıynda ornalasqan jer ýchaskesi jáne ondaǵy jyljymaıtyn múlik memleket muqtajy úshin májbúrlep ıelikten shyǵarýǵa jatady, — dep jaýap berdi bólim basshysynyń orynbasary Madına Sharbaqbaeva.
Bıyl 21 sáýirde Semeı qalasynyń azamattyq ister jónindegi aýdanaralyq soty Semeı qalasy ákiminiń L. Almaǵambetova, B. Qabyken, G. Sarjanova, D. Sarjanovaǵa qarsy jer ýchaskesin memleket muqtajyna májbúrlep alý jáne ótemaqy tóleý arqyly turǵyn úıden shyǵarý týraly talap aryzyn qanaǵattandyrǵan.
Menshik ıesi L. Almaǵambetova Abaı oblysynyń azamattyq ister jónindegi sot alqasyna apellıatsııalyq shaǵym berdi.
— 2025 jylǵy 21 shildede Abaı oblysynyń azamattyq ister jónindegi sot alqasy shaǵymdy qaraý barysynda ony qanaǵattandyrýdan bas tartý jóninde sheshim qabyldady. Qazirgi tańda joǵaryda atalǵan ákimdik qaýlysy zańdy kúshine engen. Ol eshbir tarappen daýlanbaǵan jáne joıylmaǵan. Osyǵan baılanysty Kongress holl qurylysyn salý maqsatynda jer ýchaskesin májbúrlep satyp alý jumystary 2011 jylǵy 1 naýryzdaǵy Memlekettik múlik týraly zańǵa sáıkes ári qaraı jalǵasady, — deıdi Madına Sharbaqbaeva.
Onyń aıtýynsha, Jer kodeksiniń 84-baby 2-tarmaǵynyń 5-tarmaqshasyna sáıkes, memleket muqtajy úshin májbúrlep ıelikten shyǵarý nemese satyp alý tek áleýmettik nysandardy salý úshin atqarylady.
Semeı qalasy ákimdiginiń 2024 jylǵy 22 qańtardaǵy № 29 qaýlysyna sáıkes, memleket muqtajy úshin májbúrlep ıelikten shyǵarylatyn jer ýchaskeleri áleýmettik nysan sanalatyn Kongress holl salý maqsatynda ıelikten shyǵarylady.
— 2024 jylǵy 7 qazandaǵy № 825 Úkimen qaýlysymen bekitilgen Semeı qalasynyń Bas josparynda daýly aýmaq turǵyn úı aımaǵy retinde kórsetilgeni ras. Alaıda Semeı qalasynyń sáýlet jáne qala qurylysy bólimi bul jaǵdaıdy bas jospardy jobalaýshy «NIPI Astanagenplan» JShS jobalaý kezinde jibergen qatelik retinde rastady jáne qalanyń bas josparyna ózgertý engizý qujatnamasy daıyndalyp jatqanyn baıandady, — deıdi qalalyq turǵyn úı qatynastary jáne turǵyn úı ınspektsııasy bólimi basshysynyń orynbasary.
Qalalyq sáýlet jáne qala qurylysy bólimine de habarlastyq.
Bólim basshysy Ersin Kenjebekulynyń aıtýynsha, Semeı qalasyndaǵy Teatralnaıa, Bazdyrev, Moldaǵalıeva kóshelerindegi jer telimderi aýmaǵynda Kongress-holl qurylysy josparlanǵan.
— Atalǵan egjeı-tegjeıli josparlaý jobasy 2011 jylǵy bas jospar negizinde bekitilgen jáne 2024 jylǵy Bas josparǵa tikeleı qatysy joq. Al 2024 jylǵy 7 qazandaǵy Úkimet qaýlysymen bekitilgen Semeı qalasynyń Bas josparyna sáıkes, Teatralnaıa, Bazdyrev, Moldaǵalıeva kósheleri aýmaǵynda kópqabatty úı salý kózdelgen. Alaıda jaqyn arada Bas josparǵa túzetýler engizý josparlanyp otyr. Ótepbaev kóshesi, 47 úı mekenjaıyndaǵy jer ýchaskesin májbúrlep satyp alý týraly sheshim qabyldanǵan. Ótemaqy somasy — 50 169 715 teńge, — deıdi ol.
Atalmysh bólim — bas jospar jobasynyń tapsyrys berýshisi. Kongress-holldy jobalaý jáne qurylysy týraly naqty derekter «Ádilet» aqparat júıesinde Semeı qalasynyń bas jospary týraly bóliminde kórsetilgen.
Zań boıynsha qalaı?
Semeı qalasynyń jer qatynastary bóliminiń basshysy Zańǵar Janǵalıev jer ýchaskesin memleket muqtajdyǵyna májbúrlep alyp qoıýdyń jalpy erejesi, negizdemeleri men qaǵıdattaryn túsindirip berdi.
— Semeı qalasy ákimdiginiń 2024 jylǵy 8 aqpandaǵy qaýlysymen bekitilgen ákimdik reglamentine sáıkes, Semeı qalasynyń jer qatynastary bólimi memlekettik muqtajdyq úshin jer ýchaskesin májbúrlep alyp qoıý týraly qaýlylardyń jobasyn daıyndaıdy. Bul jobalar keıin kelisý úshin qala ákiminiń apparatyna joldanady. Tıisti qaýly qabyldanǵannan keıin Semeıdiń turǵyn úı qatynastary jáne turǵyn úı ınspektsııasy bólimi Memlekettik múlik týraly zańǵa sáıkes kózdelgen rásimderdi júzege asyrady. Atap aıtqanda, menshik ıelerine jáne jer paıdalanýshylarǵa aldaǵy jer ýchaskesin jáne ózge de jyljymaıtyn múlikti májbúrlep alyp qoıý týraly jazbasha habarlama jiberedi, sondaı-aq qaýlyny iske asyrýdy qarjylandyrady. Menshik ıeleri men jer paıdalanýshylar tıisti habarlamany alǵan sátten bastap 15 kúntizbelik kún ishinde kelisim rásimin bastaý úshin Semeı qalasynyń ákimdigine ótinish berýge quqyly, — deıdi ol.
2022 jyldan bastap memlekettik muqtajdyqqa jer ýchaskesin májbúrlep alyp qoıý nemese satyp alý ókilettigi Semeı qalasynyń turǵyn úı qatynastary jáne turǵyn úı ınspektsııasy bólimine berilgen.
Bul rásim Memlekettik múlik týraly zańnyń 6-taraýynda belgilengen algorıtmge sáıkes júrgiziledi jáne myna kezeńderdi qamtıdy:
- Jer ýchaskesiniń naryqtyq qunyn baǵalaý úshin merdiger uıymdy anyqtaý boıynsha memlekettik satyp alý konkýrsyn ótkizý;
- Jer ýchaskesin memlekettik muqtajdyqtar úshin alyp qoıý týraly shart jasasý;
- Satyp alý quny boıynsha kelisimge qol jetkizilmegen jaǵdaıda — daýdy sot tártibimen sheshý.
Kazinform tilshisi Abaı oblystyq prokýratýrasyna da qońyraý shalyp, saýalhat jiberdi. Dese de ol jaqtan jaýap bolmady.
Eske salsaq, osyǵan deıin Aqtóbede 129 myń gektarǵa jýyq jer memleket menshigine qaıtarylǵany habarlanǵan.