Kongresmender Lıvııadaǵy operatsııasy úshin Obamany sotqa berdi
ASTANA. 16 maýsym. QazAqparat - AQSh Kongressi Ókilder palatasynyń músheleri el prezıdenti Barak Obama men Qorǵanys mınıstri Robert Geıtsti Lıvııadaǵy áskerı operatsııalary úshin sotqa berdi.
Sot shaǵymy quramynda Demokratııalyq jáne Respýblıkalyq partııalardyń músheleri bar ondaǵan kongresmenderdiń atynan berilgen, dep jazady Associated Press.
Parlamentshilerdiń pikirinshe, Kongrestiń qoldaýynsyz Lıvııaǵa qarsy soǵys ashý arqyly Aq úı basshysy AQSh-tyń Konstıtýtsııasyn buzǵan. Olardyń aıtýynsha, B.Obama lıvııalyq bılikke qarsy qarýly kúsh qoldanǵan bylyq-shylyǵyna NATO men BUU-ny da tartyp áketti.
Kongresmender óz shaǵymdarynda sýdıanyń Kongrestiń maquldaýynsyz amerıkandyq qarýly kúshterdiń Lıvııadaǵy operatsııalarǵa qatysýyn toqtatatyn qaýly shyǵarýyn talap etip otyr.
Búgin belgili bolǵandaı, Aq úı Kongreske Lıvııadaǵy operatsııalarǵa amerıkandyq áskerdiń qatysýy týraly tolyq aqparat jóneltetin boldy. Bul Ókilder palatasy músheleri men Senat tarapynan kórsetilgen qysym nátıjesinde júzege aspaq.
Esterińizge sala keteıik, 4 maýsymda Ókilder palatasy Kongrestiń qoldaýynsyz Lıvııada amerıkandyq áskerdi paıdalaný operatsııasyn aıyptaıtyn sheshim qabyldady.
