Kongonyń Kasaı provıntsııasynda Ebolaǵa qarsy vaktsınatsııa bastaldy — DDSU
ASTANA. KAZINFORM — Ebola vırýsyna qarsy vaktsınatsııa Kongonyń ortalyǵynda ornalasqan Býlape densaýlyq saqtaý aımaǵynda bastaldy. Bul jerde aýrý oshaǵy osy aıdyń basynda tirkelgen bolatyn, dep jazady Sınhýa.
Bul týraly jeksenbi kúni Dúnıejúzilik densaýlyq saqtaý uıymy (DDSU) habarlady.
— Qazirgi kezeńdegi vaktsınatsııa naýqany Ebolaǵa shaldyqqandarmen baılanysta bolǵan adamdar men aldyńǵy sheptegi medıtsına qyzmetkerlerine baǵyttalǵan, — delingen DDSU málimdemesinde.
Ervebo vaktsınasynan turatyn alǵashqy 400 doza Býlapege jetkizildi. Bul — qazirgi indetke sebep bolyp otyrǵan zaırlik Ebola vırýsynyń ártúrli shtamdaryna qarsy qorǵanys beretin vaktsına. Býlape — Kasaı provıntsııasyndaǵy indettiń negizgi oshaqtarynyń biri. DDSU málimetinshe, aldaǵy kúnderi taǵy shamamen 45 myń doza jetkiziledi dep kútilip otyr.
DDSU ókili Patrık Otım juma kúni Jenevada ótken baspasóz máslıhatynda: «Aldaǵy eki apta ishinde tıisti sharalar qabyldansa, indetti baqylaýǵa bolady», — dep málimdedi. Onyń aıtýynsha, el astanasy Kınshasada da shamamen 1500 doza vaktsına bar, olar arnaıy tómen temperatýrada saqtaıtyn júıe iske qosylǵannan keıin qoldanylady.
Afrıka aýrýlardy baqylaý jáne aldyn alý ortalyqtarynyń beısenbide ótken onlaın-brıfınginde jarııalaǵan derekterine sáıkes, elde 68 kúdik týǵyzǵan adam tirkelgen, olardyń 16-sy qaıtys bolǵan. Al juma kúni DDSU 25 rastalǵan jaǵdaı týraly habarlady.
Іndettiń oshaǵy Kasaı provıntsııasynyń ákimshilik ortalyǵy Chıkapa qalasyna jaqyn ornalasqan. Bul jer Angolamen shekaradan shamamen 100–200 shaqyrym qashyqtyqta. Qazirgi tańda indet shalǵaıdaǵy aýyldyq aýdandy qamtyǵanymen, Býlape men Chıkapa arasyndaǵy turǵyndar qozǵalysy kóp bolǵandyqtan, vırýstyń keńinen taralý qaýpi joǵary.
Bul Ebola indetiniń 1976 jyldan beri DR Kongoda tirkelgen 16-shy oshaǵy. DDSU málimeti boıynsha, buǵan deıin Kasaı provıntsııasynda 2007 jáne 2008 jyldary da Ebola indeti taraǵan.
Osydan buryn Kongonyń Kasaı provıntsııasynda Ebola vırýsy órshı bastaǵanyn jazǵanbyz.