Kongonyń Kasaı provıntsııasynda Ebola vırýsy órshı bastady
ASTANA. KAZINFORM — Kongo Demokratııalyq Respýblıkasynyń (KDR) Densaýlyq saqtaý mınıstrligi Kasaı provıntsııasynyń Mveka aımaǵynda Ebola vırýsynyń epıdemııasy bastalǵanyn jarııalady, dep habarlaıdy Anadoly.
Densaýlyq saqtaý mınıstri Samıýel Roje Kamba Kınshasada ótken brıfıngte Mveka aımaǵynda Ebola vırýsynyń 28 jaǵdaıy tirkelgenin aıtty.
Onyń derekteri boıynsha, epıdemııadan 15 adam qaza tapqan, onyń ishinde tórt medıtsınalyq qyzmetker bar. Aldyn ala baǵalaý boıynsha ólim-jitim deńgeıi 57% shamasynda bolsa da, zertteýler jalǵasyp jatyr jáne bul kórsetkishter naqtylanýy múmkin.
Jaýap sharalaryn úılestirý úshin úkimet qoǵamdyq densaýlyq saqtaý salasyndaǵy tótenshe jaǵdaılar operatsııalary ortalyǵyn iske qosqan. Aımaqqa jedel áreket etý toptary jiberilip, epıdemıologııalyq baqylaý kúsheıtildi, aýrýlardy oqshaýlaý boıynsha qatań sharalar engizildi.
Sonymen qatar, vırýstyń odan ári taralýyn boldyrmaý úshin jerleý rásimderi qaýipsizdik talaptaryna saı qaıta uıymdastyryldy.
Kanadada ornalasqan halyqaralyq «Shekarasyz dárigerler » uıymy (MSF) amerıkandyq X áleýmettik jelisinde óz komandasyn epıdemııa aımaǵyna jibergenin habarlady. MSF KDR ulttyq bıligi men halyqaralyq densaýlyq saqtaý seriktesterimen tyǵyz yntymaqtastyqta jumys isteıdi.
— Biz jaǵdaıdy baǵalap, epıdemııamen kúreske qalaı tıimdi úles qosýǵa bolatynyn anyqtap jatyrmyz, — delingen uıym málimdemesinde.
DDSU-nyń málimdemesi
Dúnıejúzilik densaýlyq saqtaý uıymynyń (DDSU) bas dırektory Tedros Adanom Gebreıesýs X áleýmettik jelisindegi akkaýnty arqyly Kongoda Ebolanyń qaıta órshýi rastalǵanyn habarlady.
— Ókinishke qaraı, qazirgi ýaqytta 15 adam qaıtys boldy, olardyń ishinde tórt medıtsınalyq qyzmetker bar, — dedi ol.
DDSU jergilikti bılikke qoldaý kórsetip, medıtsınalyq qyzmetkerlerdi qorǵaý jáne naýqastarǵa kómek kórsetý úshin aımaqqa mamandar men qajetti medıtsınalyq qural-jabdyqtardy jiberip jatyr.
Kongoda 1976 jyldan beri Ebola 16 ret órshigen
Ebola — bul aýyr vırýstyq ınfektsııa, ol qan aǵýmen sıpattalady jáne juqtyrǵan adam nemese janýardyń bıologııalyq suıyqtyqtarymen tikeleı baılanys arqyly taralady.
Infektsııanyń qazirgi ýaqyttaǵy órshý 1976 jyldan bastap KDR-de tirkelgen 16-shy Ebola epıdemııasy boldy.
Eń iri epıdemııa 2018–2020 jyldary Soltústik Kıvý jáne Itýrı provıntsııalarynda bolyp, 2000-nan astam adamnyń ómirin jalmaǵan edi.
Budan buryn Kongo Demokratııalyq Respýblıkasynda 10-22 qańtar aralyǵynda Ebola indetine uqsas belgileri bar aýrýdan segiz adam kóz jumdy.