Kongonyń Goma qalasynda 770-ten astam adam óltirildi

ASTANA. KAZINFORM – Kongo Demokratııalyq Respýblıkasynyń shyǵysyndaǵy Soltústik Kıvý provıntsııasynyń astanasy Goma qalasyna 26 qańtardan beri «23 naýryz qozǵalysy» (M23) atty top jaqtastary kirgennen beri qaza bolǵandar sany 773-ke jetti, dep habarlady Reuters agenttigi.

Eldiń densaýlyq saqtaý mınıstrligi taratqan aqparatqa súıensek, marqumdar jaıly aqparat qaladaǵy aýrýhanalar men máıithanalardan alynǵan. Máıithanalardyń ishi tolyp ketkendikten Goma kóshelerinde áli de adam deneleri kóp jatyr. Bir kún buryn BUU ókili Gomada 700 adam ólip, 2800 adam jaralanǵanyn habarlaǵan.

M23 jaqtastary qalany tolyq derlik jaýlap aldy. Tek soltústik aımaqtarda ǵana atystar bolyp jatyr. Qalanyń ońtústik aýdandarynda 30 qańtarda úılerge elektr jaryǵy men sý berý qalpyna keltirildi.

Kongo Demokratııalyq Respýblıkasy Úkimetiniń sheshimimen Soltústik Kıvýdyń ákimshilik ortalyǵy Gomadan ýaqytsha Benı qalasyna kóshirildi. Ol Gomadan soltústikke qaraı 244 shaqyrym jerde, Ýganda shekarasyna taıaý mańda ornalasqan.

Osyǵan deıin Ońtústik Afrıkadaǵy Stılfonteın shahtasynan 78 zańsyz kenshiniń denesi tabylǵany týraly jazdyq.