Kongodan barǵan 800-den astam bosqyn Rýandadan pana tapty

ASTANA. KAZINFORM — Sársenbiden bastap Kongo Demokratııalyq Respýblıkasynyń (KDR) 800-den astam azamaty óz eliniń shyǵysynda bolǵan zorlyq-zombylyqtan boı tasalap, Rýandaǵa ótti, dep habarlaıdy Sınhýa.

Bul týraly senbi kúni «Sınhýa» agenttigine telefon arqyly Rýandanyń Batys provıntsııasyndaǵy Rýsızı aýdanynyń basshysy Fanýel Sındaııheba habarlady.

Onyń aıtýynsha, bosqyndar M23 (23 naýryz qozǵalysy — red.) búlikshileri men kongolez armııasy arasyndaǵy shyǵystaǵy urys qımyldarynyń kúsheıýine baılanysty shekaradan ótkenderin aıtqan.

Senbi kúni Rýsızı aýdany Rýandaǵa «Býgarama–Kamanola» baqylaý-ótkizý pýnkti arqyly kelgen 117 bosqyndy qabyldady, dep qosty F. Sındaııheba. Onyń sózinshe, buryn kelgender sııaqty bul toptyń da basym bóligin áıelder men balalar quraıdy.

Osyǵan deıin Kongo men Rýanda AQSh-ta beıbitshilik týraly kelisimine qol qoıǵan edi. AQSh prezıdenti Donald Tramp Kongo Demokratııalyq Respýblıkasynyń shyǵysyndaǵy soǵystyń aıaqtalǵanyn jarııalady.

Óz kezeginde BUU Bas hatshysy Kongo men Rýanda arasyndaǵy beıbitshilik týraly kelisimdi quptady.