Kongoda stýdentter mingen qaıyq apatqa ushyrap, keminde 20 adam qaza tapty
ASTANA. KAZINFORM – Kongonyń ortalyq bóliginde memlekettik emtıhannan qaıtyp kele jatqan stýdentter mingen aǵash qaıyq sýǵa batyp, keminde 20 adam qaza tapty, dep habarlaıdy Associated Press.
Kýágerlerdiń aıtýynsha, qaıyq Kasaı provıntsııasy arqyly júzip kele jatyp, Sankýrý men Kasaı ózenderiniń qosylatyn tusynda apatqa ushyraǵan.
Ortalyq Afrıkadaǵy bul elde sýdaǵy qaıǵyly oqıǵalar jıi tirkeledi. Buǵan kóbine túngi ýaqytta ózennen ótý, qaıyqtardyń shamadan tys júktelýi, qaýipsizdik talaptarynyń saqtalmaýy jáne shalǵaı óńirlerdegi kólik ınfraqurylymynyń nashar damýy sebep bolady. Sońǵy jyldary mundaı ózen apattarynan júzdegen adam kóz jumǵan.
– 80 adam qutqaryldy, 20 adamnyń máıiti tabyldy, – dedi Kasaı provıntsııasyndaǵy Ilebo aýmaǵynyń ákimshisi Fransýa.
Alaıda qaıǵyly oqıǵanyń kýágeri Chıkýdı Jan Associated Press agenttigine qaıyqta 200-den astam adam bolǵanyn aıtty.
– Kongo Demokratııalyq Respýblıkasyndaǵy qaıyq ıeleri tek tabys tabýdy oılaıdy, al adam ómirine nemquraıly qaraıdy, – dedi Ilebo azamattyq qoǵam uıymynyń tóraǵasy Fransýa Malepo.
Aıta keteıik, buǵan deıin Malaızııa jaǵalaýynda 37 zańsyz mıgranty bar qaıyq sýǵa batyp ketkenin jazdyq.
