Kongoda sodyrlar 70-ke jýyq adamdy óltirip tastaǵan
ASTANA. KAZINFORM – Kongo Demokratııalyq Respýblıkasynyń soltústik-shyǵysyndaǵy Itýrı provıntsııasynda jasalǵan qarýly shabýyl saldarynan keminde 69 adam qaza tapty. Bul týraly jergilikti bılik ókilderi men qaýipsizdik qyzmetindegi derekkózderge súıenip AFP agenttigi jazdy.
Bul – Ýgandamen shektesetin, altyn ken oryndaryna baı Itýrı provıntsııasynda sońǵy jyldary jalǵasyp kele jatqan qandy shabýyldardyń kezektisi.
Derekkózderdiń aıtýynsha, shabýyldy sáýir aıynyń sońynda CODECO («Kongony damytý kooperatıvi») qarýly tobyna qatysy bar sodyrlar jasaǵan.
Olar sondaı-aq aımaqta CODECO jasaqtarynyń áli de bolýy saldarynan qaýipsizdik jaǵdaıy kúrdeli bolyp, qaza tapqandardyń denelerin birneshe kún boıy alyp shyǵý múmkin bolmaǵanyn aıtty.
Qaýipsizdik qyzmeti qaza tapqandar sany 69 adam ekenin málimdedi. Alaıda jergilikti azamattyq qorǵanys qyzmetiniń ókili Dedonne Losa AFP agenttigine 70-ten astam adamnyń mert bolǵanyn habarlaǵan.
CODECO toby negizinen eginshilikpen aınalysatyn lendý qaýymdastyǵynyń múddesin qorǵaıtynyn málimdeıdi. Ásirese olar mal sharýashylyǵymen aınalysatyn hema qaýymdastyǵyna qarsy áreket etetinin aıtady.
Provıntsııada áreket etetin taǵy bir qarýly top – CRP («Halyqtyq revolıýtsııa konventsııasy») ózderin hema qaýymynyń qorǵaýshysymyz dep tanystyrady.
Bul eki top aımaqtaǵy jalǵyz qarýly uıym emes. Munda sondaı-aq burynǵy ýgandalyq búlikshiler qurǵan jáne keıin «Islam memleketi» terrorıstik uıymyna adaldyq bildirgen ADF («Odaqtas demokratııalyq kúshter») toby da áreket etedi.
Jergilikti bılik pen qaýipsizdik qurylymdarynyń málimetinshe, ADF sodyrlary beısenbi kúni Itýrı jáne Soltústik Kıvý provıntsııalarynda eki kún ishinde jasalǵan shabýyldar barysynda keminde 36 adamdy óltirgen.
2021 jyldan beri Ýganda áskeri Kongo armııasymen birge Soltústik Kıvý men Itýrıdiń soltústik bóliginde ADF tobyna qarsy operatsııa júrgizip keledi. Keı jaǵdaılarda Kongo armııasy CODECO tobyn qosalqy kúsh retinde paıdalanady.
Senbi kúni BUU-nyń Kongo Demokratııalyq Respýblıkasyndaǵy mıssııasy (MONUSCO) eldiń shyǵysyndaǵy turaqsyz aımaqtarda beıbit turǵyndarǵa qarsy «ólimge ákeletin» shabýyldar tolqyny kúsheıgeni jóninde eskertý jasady.
MONUSCO málimetinshe, sońǵy kúnderi Itýrı, Soltústik Kıvý jáne Ońtústik Kıvý provıntsııalarynda ondaǵan beıbit turǵyn qaza tapqan. Alaıda uıym qosymsha málimet bermedi.
Paıdaly qazbalarǵa baı Kongonyń shyǵys óńiri sońǵy 30 jyl boıy túrli qarýly toptar, jasaqtar men armııa bólimderi arasyndaǵy qaqtyǵystardan kóz ashpaı keledi.
Eske sala ketsek, naýryz aıyndas Kongodo shahta opyrylyp, 200-den astam adam qaza tapqanyn jazdyq.
