Kongoda myńdaǵan adam úıin tastap qashýǵa májbúr boldy
ASTANA. KAZINFORM — BUU-nyń gýmanıtarlyq uıymdarynyń ókilderi sársenbi kúni Kongo Demokratııalyq Respýblıkasynyń (KDR) ońtústik-shyǵysynda tamyz aıynan beri zorlyq-zombylyqtyń kúsheıýine baılanysty myńdaǵan adam baspanasyn tastap ketkenin málimdedi, Bul týraly Sınhýa agenttigi habarlady.
BUU-nyń Gýmanıtarlyq máselelerdi úılestirý basqarmasynyń (OCHA) habarlaýynsha, uıymnyń seriktesteri dúısenbi kúni Joǵarǵy Lomamı provıntsııasyndaǵy Nambıa aýdanynan shamamen 12 myń adam Joǵarǵy Katanga provıntsııasynyń Mıtvaba aýmaǵyna qashýǵa májbúr bolǵan. Málimetke sáıkes, shabýyl saldarynan eki turǵyn qaza taýyp, birneshe adam jaralanǵan. Sondaı-aq adam urlaý oqıǵalary tirkelgen.
Basqarmanyń habarlaýynsha, osy aıdyń basynda shabýyldardan qashqan 14,5 myńǵa jýyq otbasyǵa keıin úılerin tastap ketken taǵy birneshe myń otbasy qosylǵan. Kóship kelgen adamdardy qabyldap jatqan eldi mekenderge túsetin salmaq artyp, gýmanıtarlyq kómekke degen qajettilik kúsheıgen. Ásirese, qaýipsizdik, baspana, azyq-túlik, medıtsınalyq kómek, aýyzsý jáne sanıtarııa salalarynda qoldaý qajet.
Vedomstvo zorlyq-zombylyq odan ári órshıtin bolsa, taǵy da kóp otbasy úılerin tastap ketýge májbúr bolýy múmkin ekenin eskertti. Bul muqtaj adamdarǵa kómek kórsetý jumysyn da qıyndata túsýi yqtımal.
BUU-nyń Gýmanıtarlyq máselelerdi úılestirý basqarmasy barlyq tarapty beıbit turǵyndardy qorǵaýǵa, halyqaralyq gýmanıtarlyq quqyqty saqtaýǵa jáne muqtaj adamdarǵa gýmanıtarlyq kómektiń qaýipsiz, turaqty ári kedergisiz jetkizilýin qamtamasyz etýge shaqyrdy.
Eske salaıyq, jazdyń sońynda Kongoda kóterilisshiler 50 turǵyndy urlap ketken bolatyn.
