Kongoda qarý-jaraq qoımasyna jaı túsip, birneshe adam qaza tapqan
ASTANA. 26 qańtar. QazAqparat - Kongo Demokratııalyq Respýblıkasyndaǵy Mbýdjı-Maı qalasynda ornalasqan qarý-jaraq qoımasyna túsken joıqyn naızaǵaı saldarynan bes adam qaza tapty, dep jazady ITAR-TASS.
«Aldyn ala málimetterge súıensek, bes adam qaza tapqan», - degen málimdeme jasady Ngoı Kasandjı provıntsııasynyń gýbernatory memlekettik telearnadan.
Qýatty jarylystyń kesirinen qoıma mańyndaǵy úıler de zaqymdanǵan. Jergilikti baspasóz málimetterine qaraǵanda, jarylys qurbandarynyń sany ondaǵan adamǵa jetip, kóptegen adamdar jaralanǵan.
