Kongoda ǵylymǵa beımálim maımyldyń jańa túri anyqtaldy
ASTANA. KAZINFORM – Demokratııalyq Kongo Respýblıkasynyń tropıkalyq ormandarynda ǵylymǵa buryn belgisiz bolǵan maımyldyń jańa túri anyqtaldy, dep habarlaıdy BBC.
Erekshe prımat eldiń shyǵysyndaǵy Lomamı ulttyq parkiniń qalyń tropıkalyq ormandarynda aǵash basynan baıqalǵan. Onyń erni qyzǵylt-sary tústi bolsa, tumsyǵy men júni qara.
Bul janýar alǵash ret 2008 jyly tabıǵatty qorǵaý mamandarynyń nazaryna ilingen. Alaıda sol kezde tek bulyńǵyr bir ǵana fotosýret túsirý múmkin bolǵan.
Arada on jyl ótken soń maımyl qaıta baıqalyp, ony izdeýge halyqaralyq zertteýshiler toby kiristi. Júrgizilgen zertteýler nátıjesinde onyń ǵylymǵa buryn belgisiz bolǵan jeke túr ekeni anyqtaldy.
Ǵalymdardyń aıtýynsha, bul – sońǵy 75 jyl ishinde Afrıkada tirkelgen besinshi jańa maımyl túri.
Zertteýge Florıda Atlant ýnıversıtetiniń doktoranty Djýnıor Amboko jetekshilik etti. Ǵylymı jumys barysynda janýardyń daýysy jazylyp, fotosýretteri túsirildi jáne genetıkalyq taldaý júrgizildi.
Zertteý nátıjeleri PLoS One ǵylymı jýrnalynda jarııalandy.
Osyǵan deıin amerıkalyq áıeldiń jol apatynan keıin qashyp ketken maımyldy atyp tastaǵany týraly jazdyq.
