Kongoda Ebolaǵa qarsy eki jańa vaktsına klınıkalyq synaqtan ótedi
ASTANA. KAZINFORM — Dúnıejúzilik densaýlyq saqtaý uıymy (DDU) janynan qurylǵan sarapshylar toptary Ebola vırýsyna qarsy ázirlengen eki jańa vaktsınany Kongo Demokratııalyq Respýblıkasynda ótip jatqan klınıkalyq zertteýlerge qosýdy usyndy. Bul týraly Kazinform BUU jańalyqtar qyzmetine silteme jasap habarlady.
Bul — qazirgi aýrý órshýine sebep bolǵan Býndıbýdjıo vırýsynan qorǵaý úshin arnaıy ázirlengen vaktsınalardyń naqty epıdemıologııalyq jaǵdaıda alǵash ret synalýy.
Áńgime Oksford ýnıversıteti Úndistannyń Sarysý ınstıtýtymen birlesip ázirlegen ChAdOx1 vaktsınasy jáne Moderna kompanııasynyń mRNA-1469 preparaty týraly bolyp otyr. Osy aptada DDU-nyń vaktsına-kandıdattardy irikteý jónindegi táýelsiz konsýltatıvtik toby doklınıkalyq jáne klınıkalyq zertteýlerdiń bastapqy nátıjelerine súıene otyryp, eki preparatty da ári qaraı synaýdy usyndy.
— Bul vaktsınalardyń klınıkalyq synaq kezeńine ótýge daıyn bolýy ǵylymnyń áleýeti men halyqaralyq áriptestiktiń nátıjesin kórsetedi. Osy kezeńge jetýge úles qosqan Kongo Demokratııalyq Respýblıkasyndaǵy jáne álemniń basqa elderindegi ǵalymdarǵa, medıtsına qyzmetkerlerine, seriktesterge, ásirese zertteýge qatysýshylarǵa alǵys aıtamyn, — dedi DDU bas dırektory Tedros Adhanom Gebreıesýs.
Zertteý barysynda biryńǵaı hattama boıynsha birneshe vaktsına-kandıdattyń tıimdiligi qatar baǵalanady. Ǵalymdar «saqınaly vaktsınatsııa» ádisin qoldanady. Bul tásil boıynsha zertteýge Býndıbýdjıo vırýsynan týyndaǵan aýrýy rastalǵan naýqastarmen baılanysta bolǵan adamdar qatysady.
Bul ádis DDU men onyń seriktesteriniń osydan on jyl buryn Batys Afrıkada Ebola indeti kezinde jınaǵan tájirıbesine negizdelgen. Sol kezde Gvıneıada júrgizilgen zertteý Ervebo vaktsınasynyń tıimdiligin rastaǵan edi. Qazirgi zertteý aıasynda Ervebo vaktsınasynyń Býndıbýdjıo vırýsyna qarsy áseri de alǵash ret baǵalanady.
Sonymen qatar aýrýdy emdeýdiń yqtımal tásilderi de synalyp jatyr. DDU qoldaýymen júrgizilip jatqan zertteýlerdiń biri MBP134 monoklonaldy antıdenesi, remdesıvır vırýsqa qarsy preparaty nemese olardyń kombınatsııasy Býndıbýdjıo vırýsyn juqtyrǵan naýqastardyń aman qalý múmkindigin arttyra ala ma degen máseleni qarastyrady.
Budan bólek, jaqyn arada zertteýge maftıvımab preparaty qosylyp, onyń emdeý quraly retindegi áleýeti baǵalanady. Sondaı-aq obeldevısır preparatyn qoldaný arqyly juqtyrǵan adammen baılanystan keıingi profılaktıka boıynsha jeke zertteý júrgizilip jatyr.
Emdeý ádisterine qatysty alǵashqy zertteý nátıjeleri aldaǵy birneshe aıda jarııalanady. Al vaktsınalardyń klınıkalyq synaq qorytyndysy 2027 jyldyń basynda belgili bolady.
Eske salaıyq, buǵan deıin Afrıka elderi Ebola indeti órshise de, shekarasyn jappaı otyrǵanyn habarlaǵan edik.
