Ebola: Kongo Demokratııalyq Respýblıkasynda qaıtys bolǵandar sany 82 adamǵa jetti
ASTANA. KAZINFORM – Kongo Demokratııalyq Respýblıkasynda Ebola bezgeginen kóz jumǵandar men vırýs juqtyrǵandar sany kúrt ósti. Qaza tapqandardyń jalpy sany 82 adamǵa jetti, dep habarlaıdy TASS agenttigi.
Kongo Demokratııalyq Respýblıkasy Densaýlyq saqtaý mınıstrliginiń málimetinshe, sońǵy táýlikte Eboladan qaıtys bolǵandar sany 18 adamǵa artyp, 82-ge jetken.
Sonymen qatar tirkelgen ınfektsııa juqtyrý jaǵdaılary 71-ge kóbeıip, jalpy sany 452 adamdy qurady. Jańadan anyqtalǵan naýqastardyń eleýli bóligin áıelder quraıdy.
Vedomstvo ókilderi kórsetkishterdiń kúrt ósýi tek ınfektsııanyń taralýymen ǵana baılanysty emes ekenin atap ótti. Buǵan qosa, medıtsına qyzmetkerleri indettiń negizgi oshaǵy sanalatyn Itýrı provıntsııasynyń buryn jetý qıyn bolǵan aýdandaryna kire alǵan.
Atap aıtqanda, áńgime Mahagı aýdany týraly bolyp otyr. Ýgandamen shekarada ornalasqan bul aýmaqta buǵan deıin qarýly toptardyń áreketi medıtsınalyq jumystarǵa kedergi keltirgen.
Kongo Demokratııalyq Respýblıkasy men Ýganda bıligi Ebolanyń jańa órshýi bastalǵanyn 15 mamyrda jarııalady.
Afrıka odaǵynyń baǵalaýynsha, qazirgi jaǵdaı 1976 jyly vırýs alǵash ret anyqtalǵannan bergi eń aýqymdy ári eń aýyr indetterdiń biri sanalyp otyr.
Aıta keteıik, buǵan deıin Kenııada Ebola karantın ortalyǵyn ashýǵa qarsy sherý kezinde eki adam qaza tapqanyn jazdyq.
