Kongoda Ebola juqtyrǵandar sany 452 adamǵa jetti
ASTANA. KAZINFORM – Kongo Demokratııalyq Respýblıkasynda Ebola bezgegimen aýyrǵandardyń sany 452 adamǵa jetti. Onyń ishinde 82 adam kóz jumǵan, dep habarlaıdy Sınhýa.
Eldiń Densaýlyq saqtaý mınıstrligi jarııalaǵan sońǵy esepke sáıkes, 4 maýsym kúni Itýrı jáne Soltústik Kıvý provıntsııalarynda aýrýdyń 71 jańa jaǵdaıy tirkelgen. Onyń 21-i ólimmen aıaqtalǵan.
Mamandar bul jaǵdaı Býndıbýgıo shtamynan týyndaǵan indettiń jergilikti jerde jyldam taralyp jatqanyn kórsetetinin atap ótti.
Qazirgi ýaqytta 258 naýqas oqshaýlanǵan nemese statsıonarlyq em qabyldap jatyr. Segiz adam dertten aıyqqan.
Esepte indetpen kúrestegi negizgi qıyndyqtardyń biri naýqastarmen baılanysta bolǵan adamdardy baqylaý ekeni aıtylǵan. Baqylaýǵa alynǵan 4766 adamnyń tek 2755-i ǵana tekserilgen. Bul jalpy kórsetkishtiń 57,8 paıyzyn quraıdy.
Kongo bıligi indetke qarsy kúres barysynda birqatar problemanyń baryn málimdedi. Atap aıtqanda, qaıtys bolǵan adamdardan synama alýǵa qarsylyq kórsetý, Ebolany emdeýge arnalǵan standarttalǵan múmkindikterdiń jetkiliksizdigi, baılanysta bolǵandardy tıimdi qadaǵalamaý, negizgi dári-dármektiń tapshylyǵy, Soltústik Kıvýda ınfektsııalardyń aldyn alý quraldarynyń jetispeýi, habarlaý júıesiniń álsizdigi jáne 21,5 mln AQSh dollary kólemindegi qarjy tapshylyǵy ataldy.
Aıta keteıik, DDU Ebola indetimen kúresý úshin 518 mln dollarlyq baǵdarlamany iske qosty.
