Kongoda Ebola indetinen qaza tapqandar sany 2,3 myńnan asty
ASTANA. KAZINFORM — Kongo Demokratııalyq Respýblıkasynda Ebola vırýsynyń taralýy saldarynan qaza tapqandar sany 2 325 adamǵa jetti. Qazirgi indet el tarıhyndaǵy eń kóp adam ólimine ákelgen Ebola órshýi boldy, dep habarlaıdy The Guardian.
Kongo Demokratııalyq Respýblıkasynyń Ulttyq qoǵamdyq densaýlyq saqtaý ınstıtýtynyń málimetinshe, aýrýdyń rastalǵan jaǵdaılarynyń sany 4 945-ke jetti. Tek sońǵy táýlikte taǵy 101 jaǵdaı anyqtalǵan.
Infektsııa eldegi 26 provıntsııanyń altaýyna tarady. Aýrýdyń basym bóligi eldiń soltústik-shyǵys óńirlerinde tirkelgen. Іndet alǵash anyqtalǵan Itýrı provıntsııasynda 3 400-den astam jaǵdaı tirkeldi.
Dúnıejúzilik densaýlyq saqtaý uıymynyń baǵalaýynsha, qazirgi indet buryn tirkelgen Ebola epıdemııalarynyń barlyǵynan jyldam taralyp jatyr. Úsh aıǵa jetpeıtin ýaqyt ishinde eki myńnan astam adam kóz jumdy. Salystyrmaly túrde, 2014–2016 jyldary Batys Afrıkada bolǵan aýqymdy indet kezinde qaza tapqandar sany bes aıǵa jýyq ýaqytta myń adamǵa jetken.
Qazirgi ınfektsııanyń taralýyna Býndıbýdjıo vırýsynyń sırek kezdesetin shtamy sebep bolyp otyr. Ázirge oǵan qarsy maquldanǵan vaktsına nemese arnaıy emdeý ádisi joq. Kongo Demokratııalyq Respýblıkasynda eki yqtımal dári-dármektiń klınıkalyq synaqtary bastaldy. Sonymen qatar eki vaktsına da synaqtan ótkizilip jatyr.
Qolda bar málimetterge sáıkes, shamamen myń naýqas saýyǵyp shyqqan. Taǵy 730 adam medıtsınalyq mekemelerde nemese oqshaýlanǵan jaǵdaıda em alyp jatyr.
Infektsııanyń taralýyna qarsy kúresti naýqastardyń medıtsınalyq kómekke kesh júginýi, ınfraqurylymnyń jetkiliksiz damýy jáne medıtsınalyq mekemelerge jasalǵan shabýyldar qıyndatyp otyr. Dúnıejúzilik densaýlyq saqtaý uıymynyń málimetinshe, naýqastardyń 70 paıyzdan astamy medıtsınalyq ortalyqtardan tys jerde qaıtys bolady.
Buǵan deıin Dúnıejúzilik densaýlyq saqtaý uıymy Kongo Demokratııalyq Respýblıkasynda ár 30 mınýt saıyn bir adam Eboladan kóz jumatynyn habarlaǵan.
