Kongoda Ebola indetinen qaıtys bolǵandar sany 60-qa jetti
ASTANA. KAZINFORM — Kongo Demokratııalyq Respýblıkasynda Ebola bezgeginiń órshýi saldarynan rastalǵan ólim-jitim sany 60 adamǵa jetti. Bul týraly Dúnıejúzilik densaýlyq saqtaý uıymynyń (DDU) bas dırektory Tedros Adanom Gebreıesýs málimdedi, dep habarlaıdy Sınhýa.
Onyń aıtýynsha, eldiń úsh provıntsııasy men 24 medıtsınalyq aımaǵynda aýrýdyń 344 rastalǵan jaǵdaıy tirkelgen. Onyń ishinde 60 naýqas kóz jumǵan. Sonymen qatar kúdikti jaǵdaılar sany ótken aptadaǵy myńnan astam kórsetkishten qazirgi 116 jaǵdaıǵa deıin azaıǵan.
Jýyrda Kongo Demokratııalyq Respýblıkasyna saparmen baryp qaıtqan Tedros Adanom Gebreıesýs indetpen kúreske jergilikti bılik pen medıtsına qyzmetkerleriniń belsendi qatysyp jatqanyn atap ótti.
— Men kórgen jaǵdaılar maǵan úmit syılady. Degenmen sheshimin kútken máseleler áli de bar, — dedi ol.
DDU basshysy birlesken kúsh-jiger men úılestirilgen is-qımyldardyń arqasynda Ebola indetiniń taralýyn tejeýge baǵyttalǵan sharalar oń nátıje bere bastaǵanyn aıtty. Onyń sózinshe, qabyldanyp jatqan sharalar aýrýdyń odan ári taralýyn baqylaýǵa múmkindik berip otyr.
Eske salaıyq, Dúnıejúzilik densaýlyq saqtaý uıymy Kongo Demokratııalyq Respýblıkasyndaǵy Ebola indetimen kúreske aldaǵy úsh aıda 115 mıllıon AQSh dollary qajet ekenin málimdedi.
