Kongoda Ebola indeti bosqyndarǵa arnalǵan lagerlerge taraldy
ASTANA. KAZINFORM – BUU gýmanıtarlyq agenttikteri Kongo Demokratııalyq Respýblıkasynda (KDR) tez taralatyn Ebola vırýsynyń Býndıbýdjıo túrin 19 ishki bosqyn juqtyrǵany, olardyń beseýi qaıtys bolǵany týraly habarlamalar aıasynda joǵary daıyndyq deńgeıinde, dep habarlaıdy BUU jańalyqtar qyzmeti.
BUU Bosqyndar isteri jónindegi Joǵarǵy komıssary (BUU BІJK) Itýrı provıntsııasynda bosqyndarǵa arnalǵan 69 lagerdiń kem degende beseýinde Ebola aýrýynyń anyqtalǵanyn rastady. Bul onsyz da qaýipti indetke qarsy kúresti odan ári qıyndatyp otyr.
Jergilikti bıliktiń málimetinshe, 15 mamyrda indet resmı túrde jarııalanǵannan beri shamamen 4000 jaǵdaı jáne 1800-den astam ólim tirkelgen. Aýrýdyń taralý oshaǵy Itýrı provıntsııasy bolyp qalyp otyr.
BUU BІJK bosqyndar men baspana izdeýshiler arasynda ázirge eshqandaı jaǵdaı anyqtalmaǵanyn atap ótti. Áıtpese, vırýs KDR tys jerlerge taralý qaýpin tóndiretin edi.
Dúnıejúzilik densaýlyq saqtaý uıymynyń (DDU) bas dırektory Tedros Adhanom Gebreıesýs atap ótkendeı, epıdemııanyń rekordtyq aýqymy ony tejeý jumystaryn aıtarlyqtaı qıyndatyp otyr.
- Biz barlyq jaýap berý salalarynda jáne barlyq seriktestiń qatysýymen kúsh-jigerimizdi shuǵyl túrde kúrt keńeıtýimiz kerek degenmen kelisemiz, - dep jazdy Gebreıesýs áleýmettik jelilerde Kongo Demokratııalyq Respýblıkasynyń astanasy Kınshasaǵa sapary kezinde.
Lagerler úshin qaýip artty
Ebola aýrýyn juqtyrý rastalǵan Itýrı, Soltústik Kıvý, Ońtústik Kıvý, Joǵarǵy Ýele jáne Chopo provıntsııalarynda qazirgi ýaqytta shamamen 4,4 mln ishki qonys aýdarǵan adam turady. Epıdemııadan zardap shekken aımaqtar kóbinese KDR shyǵysyndaǵy qaqtyǵystan eń kóp zardap shekken aımaqtarmen sáıkes keledi.
BUU BІJK qonys aýdarý lagerleriniń turǵyndary kóbine sý men sanıtarlyq-gıgıenalyq nysandarǵa qol jetkize almaıtynyn jáne densaýlyq saqtaý qyzmetterine senimsiz ekenin eskertti. Munyń bári Ebola vırýsynyń odan ári taralýyna qolaıly jaǵdaı jasaıdy.
Epıdemııaǵa qarsy sharalardy keńeıtý
BUU gýmanıtarlyq seriktestermen jáne KDR bıligimen birlesip baqylaý, zerthanalyq tekserýler, emdeý jáne qoǵammen baılanys ornatýdy keńeıtýdi jalǵastyryp keledi. Eldegi BUU bitimgershilik kúshteri densaýlyq saqtaý mekemelerine shabýyldardyń aldyn alý úshin de jumys istep jatyr.
Mamyr aıynda BUU Bas hatshysynyń Gýmanıtarlyq ister jónindegi orynbasary Tom Fletcher Ebola indetimen kúresý úshin Ortalyq tótenshe jaǵdaılarǵa jaýap berý qorynan 60 mln dollar bólinetinin jarııalady. Sonymen qatar DDU jáne onyń seriktesteri mamandandyrylǵan emdeý ortalyqtaryn qurýdy jáne qoldaýdy jalǵastyryp otyr.
Osyǵan deıin Kongo DR-daǵy Ebola el tarıhyndaǵy eń iri indetke aınalǵanyn jazdyq.
Dúnıejúzilik densaýlyq saqtaý uıymy Kongo Demokratııalyq Respýblıkasyndaǵy Ebola indetimen kúresti kúsheıtý úshin halyqaralyq qaýymdastyqty qosymsha qoldaý kórsetýge shaqyrdy.
