Kongoda Ebola indetinen 200-den astam adam qaıtys boldy
ASTANA. QazAqparat - Kongo Demokratııalyq Respýblıkasynda Ebola indeti beleń aldy. Shilde aıynan beri osy dertten kóz jumǵandar sany 200-den asty. Bul týraly keshe eldiń densaýlyq saqtaý mınıstrligi Tvıtterdegi paraqshasynda málim etti, dep habarlaıdy QazAqparat.
«10 qarashaǵa deıin jalpy 326 adam Ebola aýrýyn juqtyrdy degen kúdikpen tirkeldi, sonyń 291-i rastaldy, qalǵan 35-inde áli anyqtalmady», - delingen habarlamada.
VVS-diń habarlaýynsha, sońǵy kúnderi bul aýrýdy jeti adam juqtyrǵany, úsh adamnyń ajal qushqany anyqtaldy. Ásirese KDR-dyń Soltústik Kıvý jáne Itýrı provıntsııalaryndaǵy ahýal kúrdeli.
Qaıtys bolǵandardyń jalpy sany 201-ge jetti, 166-synda vırýs zerthana taldaýlary arqyly dáleldengen.
Ebolamen aýyrǵan 98 adamnyń syrqatynan aıyqqany ázirge dárigerlerdiń kóńiline dem berip otyr. 8 tamyzdan beri elde 28 303 adamǵa qaýipti vırýsqa qarsy vaktsına egilgen.
