Kongoda Ebola bezgeginiń órshýi 29 medıtsınalyq aımaqqa áser etti
ASTANA. KAZINFORM — Kongo Demokratııalyq Respýblıkasynda Ebola bezgegin juqtyrýdyń rastalǵan jaǵdaıynyń sany 689 adamǵa jetti, 139 patsıent qaıtys boldy, dep habarlaıdy Sınhýa.
Bul týraly eldiń densaýlyq saqtaý organdarynyń juma, 12 maýsymda jarııalaǵan sońǵy esebinde aıtylǵan.
Beısenbi kúni aýrý juqtyrýdyń 17 jańa rastalǵan jaǵdaı tirkeldi, bes adam qaıtys boldy. Olardyń barlyǵy shyǵystaǵy Itýrı provıntsııasynda boldy. Ebola-Býndıbýgıo vırýsynan týyndaǵan qazirgi indet shyǵystaǵy úsh provıntsııa: Itýrı, Soltústik Kıvý jáne Ońtústik Kıvýdaǵy 29 medıtsınalyq aımaqqa áser etti.
Beısenbi kúngi jaǵdaı boıynsha barlyǵy 168 boljamdy jaǵdaı tirkeldi, 64 patsıent qaıtys boldy.
Esepte sonymen qatar birqatar qıyndyqtar, sonyń ishinde ólimnen keıin juǵyndylar alýǵa qarsy shyǵý, ortalyqtardyń Ebolany emdeýde múmkindikteri shekteýli bolýy, Soltústik Kıvýda ınfektsııanyń aldyn alý jáne baqylaý quraldarynyń jetispeýshiligi, úsh provıntsııada habarlandyrý júıesiniń álsiz bolýy jáne 21,5 mln dollar qarjylandyrý tapshylyǵy atap ótildi.
BUU Bosqyndar isteri jónindegi Joǵarǵy komıssarynyń beısenbi kúni jarııalaǵan esebine sáıkes, Itýrıde qonys aýdarǵan adamdarǵa arnalǵan lagerde Ebolamen baılanysty eki ólim tirkelgen.
KDR Densaýlyq saqtaý mınıstrligi qazirgi indettiń órshýi týraly 15 mamyrda resmı túrde jarııalady. Bul elde 1976 jyly vırýs anyqtalǵannan beri 17-shi Ebola indeti.
Osyǵan deıin Kongoda Ebola bezgeginiń 676 rastalǵan jaǵdaıy tirkeldi.
Sondaı-aq EO Kongodaǵy Ebola indetimen kúreske qosymsha 5 mln eýro bóletinin habarladyq.
