Kongoda Ebola bezgeginiń 676 rastalǵan jaǵdaıy tirkeldi — DDU
ASTANA. KAZINFORM — Aýrýdyń jańa jaǵdaılary kún saıyn anyqtalyp jatyr. Mamandar indetke shaldyqqandardyń naqty sany resmı tirkelgen kórsetkishten áldeqaıda kóp bolýy múmkin ekenin aıtty, dep habarlaıdy Anadoly.
Dúnıejúzilik densaýlyq saqtaý uıymy epıdemıologııa jáne den qoıý sharalaryn taldaý bóliminiń jetekshisi Olıve le Polenniń málimdeýinshe, keshe kúngi jaǵdaı boıynsha Kongo Demokratııalyq Respýblıkasy aýmaǵynda Ebola bezgeginiń 676 rastalǵan jaǵdaıy tirkelgen. Onyń ishinde 136 adam qaıtys boldy. Bul týraly Olıve le Polen Birikken Ulttar Uıymy-nyń Jenevadaǵy keńsesinde ótken aptalyq baspasóz máslıhatynda aıtty.
Onyń sózinshe, Kongodaǵy indet juqtyrǵandar sany men taralý aýmaǵy boıynsha keńeıip keledi.
— Densaýlyq saqtaý mınıstrliginiń deregine sáıkes, keshe kúngi jaǵdaı boıynsha 676 rastalǵan jaǵdaı tirkeldi, onyń 136-sy qaıtys boldy. Naýqastardyń basym bóligi Itýrı provıntsııasynda anyqtalǵanymen, aýrý Soltústik Kıvý men Ońtústik Kıvýdaǵy 34 medıtsınalyq aýdanda da tirkeldi, — dedi ol.
DDU ókili jańa jaǵdaılar kún saıyn anyqtalyp jatqanyn aıtyp, indetke shaldyqqandardyń naqty sany resmı statıstıkadan áldeqaıda kóp bolýy múmkin ekenin jetkizdi.
Onyń aıtýynsha, DDU Kongo úkimetimen birlesip indetpen kúres júrgizip jatyr. Mamandar halyqtyń joǵary kóshi-qony, densaýlyq saqtaý júıesiniń álsizdigi jáne eldegi turaqsyz jaǵdaı epıdemııaǵa qarsy kúresti qıyndatyp otyrǵanyn atap ótti.
Ebola indeti 15 mamyr kúni Kongonyń shyǵysyndaǵy Itýrı provıntsııasynda 246 kúdikti jaǵdaı men 65 ólim tirkelgennen keıin jarııalanǵan bolatyn.
17 mamyrda Dúnıejúzilik densaýlyq saqtaý uıymy Ebola indetiniń qaıta órshýine baılanysty densaýlyq saqtaý salasynda halyqaralyq tótenshe jaǵdaı jarııalady.
Densaýlyq saqtaý sheneýnikteri qazirgi epıdemııa Ebola vırýsynyń «Býndıbýg» dep atalatyn sırek shtammynan týyndap otyr, oǵan qarsy bekitilgen em nemese vaktsına joq.
Bul indetpen dertke shaldyqqandar sany 1000-nan asty.
Buǵan deıin EO Kongodaǵy Ebola indetimen kúreske qosymsha 5 mln eýro bóletini týraly jazdyq.
