Kongoda bastalǵan Ebola indeti taǵy tórt elge tarady
ASTANA. KAZINFORM — 2026 jylǵy mamyrda Kongo Demokratııalyq Respýblıkasynda (KDR) bastalǵan Ebola bezgeginiń órshýi taǵy tórt elge tarady. KDR-dyń ózinde aýrý juqtyrǵandar sany 9,5 myń adamnan asyp, olardyń 4,6 myńnan astamy qaıtys boldy, dep habarlaıdy Associated Press.
Dúnıejúzilik densaýlyq saqtaý uıymynyń (DDU) málimetinshe, bul indet baqylaý tarıhyndaǵy eń jyldam taralǵan indetke aınaldy. Aýrý Ortalyq, Shyǵys jáne Batys Afrıkada, sondaı-aq Frantsııada tirkelgen.
Іndettiń órshýine Ebola vırýsynyń sırek kezdesetin Býndıbýdjıo túri sebep bolǵan. Qazirgi ýaqytta bul vırýsqa qarsy maquldanǵan vaktsına da, arnaıy emdeý ádisi de joq.
Aýrý juqtyrǵany sońǵy ret rastalǵan el — Nıgerııa. Munda Ýgandadan el astanasy Abýdjaǵa kelgen áıelden ınfektsııa anyqtaldy. Onyń boıynda alǵashqy belgiler 7 qazanda baıqalyp, 11 qazanda naýqas jeke klınıkaǵa jatqyzyldy.
Nıgerııanyń densaýlyq saqtaý mınıstri Muhammad Pate mamandar naýqaspen baılanysta bolǵan 44 adamdy anyqtaǵanyn habarlady. Bılik ınfektsııanyń odan ári taralýyna jol bermeý úshin sharalar qabyldap jatyr.
Ýgandada Ebola indeti kórshiles Kongo Demokratııalyq Respýblıkasymen bir mezgilde, mamyr aıynda tirkeldi. Elde barlyǵy 20 adam ınfektsııa juqtyrǵany anyqtalyp, olardyń ekeýi qaıtys boldy. Taǵy 18 naýqas saýyǵyp ketti. DDU 27 tamyzda Ýgandadaǵy indettiń aıaqtalǵanyn jarııalady. Elde jańa jaǵdaılar tirkelgen joq.
Kenııada aýrýdyń alǵashqy jaǵdaıy 6 qazanda Kongodan Ýganda arqyly kelgen er adamnan anyqtaldy. Keıin naýqas qaıtys boldy.
Qazirgi ýaqytta elde ınfektsııa juqtyrǵandar sany toǵyz adamǵa jetti. Olardyń arasynda alǵashqy naýqastyń tórt týysy men tórt medıtsına qyzmetkeri bar. Bılik naýqastarmen baılanysta bolǵan 135 adamdy anyqtady. Olardyń 134-i karantınge alynǵan.
Afrıkadan tys jerde aýrý Frantsııada anyqtaldy. Maýsym aıynda Kongodaǵy gýmanıtarlyq mıssııadan oralǵan dárigerden ınfektsııa rastaldy. Em qabyldaǵannan keıin naýqas saýyǵyp, 4 shildede medıtsınalyq mekemeden shyǵaryldy.
Mamandardyń baǵalaýynsha, vırýstyń taralýyna qarsy kúrestegi negizgi máselelerdiń biri — ınfektsııa juqtyrǵandardy der kezinde anyqtamaý. Kóptegen jaǵdaıda dıagnoz alǵashqy belgiler paıda bolǵannan keıin uzaq ýaqyt ótken soń nemese naýqastar bir elden ekinshi elge barǵannan keıin ǵana rastalǵan.
Buǵan deıin Kongo Demokratııalyq Respýblıkasynda Eboladan ár 30 mınýt saıyn bir adam qaıtys bolatyny habarlanǵan edi.
Aıta ketelik Nıgerııada Ebola vırýsyn juqtyrýdyń alǵashqy jaǵdaıy tirkeldi.
