Kongoda 66 sarbaz «qorqaqtyǵy» úshin ólim jazasyna kesildi
ASTANA. KAZINFORM — Kongo Demokratııalyq Respýblıkasynda 66 sarbaz qorqaqtyq, búlikshilik jáne buıryqtarǵa baǵynbaý aıyptarymen ólim jazasyna kesildi. Bul týraly BBC habarlady.
Jergilikti BAQ-tyń jazýyna qaraǵanda, sarbazdar 20 qazanda Valıkalede ustalǵan. 71 sarbaz sottaldy. 4-eýi aqtalyp, 1-eýi 10 jylǵa bas bostandyǵynan aıyryldy.
Sarbazdarǵa aımaqtaǵy ondaǵan jyldarǵa sozylǵan qarýly qaqtyǵys kezinde jaýyngerlik pozıtsııalaryn tastap, qashyp ketti dep aıyp taǵylǵan.
Armııa bul sot protsesi sarbazdar arasyndaǵy tártipti nyǵaıtýǵa baǵyttalǵanyn málimdedi.
Jergilikti armııa tártiptiń nasharlyǵy men uıymdastyrýshylyq máseleler úshin únemi synǵa ushyrap keledi. Degenmen, sarbazdardyń ózderi jalaqynyń tómendigi men logıstıkalyq qoldaýdyń jetkiliksizdigine shaǵymdanady. Ótken aıda kóterilisshilermen qaqtyǵys kezinde maıdan shebinen shegingeni úshin 27 áskerı qyzmetker osyndaı aıyptar boıynsha ólim jazasyna kesilgen.
Eske sala keteıik, 2024 jyldyń naýryz aıynda Kongo Demokratııalyq Respýblıkasynyń bıligi ólim jazasyna engizilgen 20 jyldyq moratorııdiń kúshin joıdy. Úkimet bul sheshimge qarýly kúshterdegi opasyzdyqpen kúresý qajettiligin sebep etip kórsetedi. Sondaı-aq, qarýly toptardyń múshelerine, kóterilisterge, opasyzdyqqa jáne soǵys qylmystaryna qatysqan adamdarǵa ólim jazasy qarastyrylǵan.
Ólim jazasyn qalpyna keltirý týraly sheshimdi adam quqyqtary uıymdary synap otyr.
Frantsııanyń RFI telearnasynyń málimeti boıynsha, 2025 jyldyń basynan beri Kongo Demokratııalyq Respýblıkasynda keminde 507 áskerı qyzmetker sottalǵan, olardyń 381-i ólim jazasyna kesilgen.
Eske sala keteıik, AQSh-ta sońǵy 60 jylda alǵash ret áskerı qyzmetshini ólim jazasyna kesý úkimi maquldandy.
