Kongo polıtsııasy prezıdenttik saılaýdy keıinge shegerýge qarsy bolǵandardy atyp tastady
ASTANA. QazAqparat - Kongo astanasy Kınshastaǵy narazylyq sharalary kezinde resmı aqparattar boıynsha, 17 adam mert boldy. Onyń 3-ýi polıtsııa qyzmetkeri.
19 qyrkúıekte myńdaǵan adam prezıdent Jozef Kabılaǵa narazylyq bildirip, onyń prezıdenttik saılaýdy keıinge shegerýine qarsyyylyq tanytty, dep habarlady Reuters.
Quqyq qorǵaýshylardyń málimetterinshe, polıtsııa qyzmetkerleri 25 narazylyq bildirýshini atyp tastaǵan.
Kabılanyń ókilettilik merzimi jeltoqsan aıynda aıaqtalady. Oppozıtsııa ony qarasha aıynda ótýi tıis saılaýdy keıinge shegerý arqyly óziniń merzimin uzartýdy kózdep otyr dep aıyptady. Prezıdentti jaqtaýshylar muny joqqa shyǵardy.
«Resmı derekterge sáıkes, Kınshasta 17 adam ajal qushty. Onyń 3-ýi polıtsııa qyzmetkeri, 14-i jergilikti turǵyn», - dedi polıtsııa ókili Klod Pero Lývara.
Polıtsııa mert bolǵan 14 turǵynnyń tonaýshylar bolǵanyn aıtty. «Ádilettilikke qol jetkizýdi qoldaıtyn «Kongolez qaýymdastyǵy» jergilikti úkimettik emes uıymynyń basshysy Jorj Kapıamba kúsh qurylymdary ókilderiniń 25 adamdy atqanyn málimdedi.
Keshke qaraı respýblıkadaǵy negizgi oppozıtsııalyq partııalardyń biriniń shtab-páteri órtendi. Ǵımarattan otqa oranǵan úsh adamnyń máıiti tabyldy.
