Kongo-qyrym qandy bezgek qaýpi bar 116 eldi meken anyqtaldy - Qyzylorda
Qyzylorda oblysy Kongo-qyrym qandy bezgegi tabıǵı oshaǵynda ornalasqan. 2020 jyly atalǵan indettke 9 adam shaldyqsa, 2021 jyly ol 12 jaǵdaıdy qurady.
«Bıyl óńirde 116 eldi meken qaýiptiń bolýy yqtımal dep tirkeldi. Atap aıtqanda, aýdandar boıynsha Aralda - 25, Jańaqorǵanda - 19, Shıelide - 16, Qazalyda - 14 eldi meken bolsa, qalǵany ózge aýdandarda ornalasqan. Bul eldi mekenderdiń zalalsyzdandyrý is-sharalaryna jergilikti bıýdjetten qarjy qarastyrylǵan. Al qolaısyz dep tanylmaǵan eldi mekenderdiń turǵyndary zalalsyzdandyrý jumystaryn óz qarajattaryna júrgizedi», - dep málim etti Qyzylorda oblystyq Sanıtarııalyq-epıdemıologııalyq baqylaý departamentinen.
Vedomstvo málimetinshe, entomolog mamandardan turatyn 3 arnaıy jumysshy top qurylyp, 239 eldi mekende zoologııalyq barlaý jumystaryn júrgizýde. Jumys barysynda 5 154 kene jınalyp, 503 synama zertteldi. Nátıjesinde janýarlardan jáne dalalyq jerden jınalǵan kenelerdiń 7 synamasynan oń nátıje anyqtaldy. Jyl basynan beri kene shaǵýǵa baılanysty medıtsınalyq kómekke 11 adam júgindi.
