Kongo-qyrym qandy bezgeginen saqtaný úshin qosymsha 588 mln. teńge bólinýi tıis - B. Jylqyshıev
ASTANA. Maýsymnyń 10-y. QazAqparat /Qanat Mámetqazyuly/ -Búgin QR Parlamenti Senatynyń jalpy otyrysynda Premer-Mınıstrdiń atyna saýal joldaǵan senator Bolat Jylqyshıev Úkimetten Ońtústik Qazaqstan oblysyna kongo-qyrym qandy bezgeginen saqtaný úshin qosymsha qarajat bólýdi surady.
«Ońtústik Qazaqstan óńiri epıdemıologııalyq, ásirese kongo-qyrym qandy bezgegi ınfektsııasynyń taralýy boıynsha jaǵymsyz aımaq bolyp otyr. Epıdemıologııaǵa qarsy júıeli sharalardyń qamtylmaýy saldarynan sońǵy jyldary bundaı keseldi jaıttar oryn alyp keledi. 2009 jylǵy shilde aıynda atalǵan juqpaly derttiń 23 oqıǵasy tirkeldi. Onda 8 adam qaıtys boldy. Al aǵymdaǵy jyldyń ózinde qandy bezgekti juqtyrýdyń 10 oqıǵasy oryn alyp, 3 adam kóz jumdy», dedi B. Jylqyshıev.
Senatordyń aıtýyna qaraǵanda, Ońtústik Qazaqstan oblysynyń ákimdigi atalǵan juqpaly náýbetpen kúreske 380 mln. teńge bólgen. Al júrgizilgen sharalardyń tıimdiligi tek 40-45 kúnnen soń ǵana belgili bolatyn kórinedi. Sondyqtan da, júrgizilgen júıeli sharalardy aǵymdaǵy jylǵy maýsym-shilde aılarynda taǵy qaıtalaý qajet.
«Osyǵan oraı, Ońtústik Qazaqstan oblysyna atalǵan is-sharalardy júzege asyrý úshin bıýdjetten 588 mln. teńge bólýdi suraımyn», dedi senator.
