Kongo-Qyrym qandy bezgegin taratatyn qaýipti kenelerden qalaı saqtanamyz?
ASTANA. QazAqparat - QR Tutynýshylardyń quqyqtaryn qorǵaý agenttigi tóraǵasynyń orynbasary - Qazaqstannyń bas sanıtarlyq dárigeri Jandarbek Bekshın kóktemgi maýsymda belsene túsetin kenelerden saqtanýdyń amaldary týraly aıtyp berdi.
«Kongo-Qyrym qandy bezgeginen saqtanyp, onyń aldyn alý úshin adamdar arnaıy kıim kııýi tıis. Negizinen keneler óz «oljasyn» kóktemgi jáne jazǵy maýsymdarda jol boıyndaǵy shóptesinderde, ormandaǵy sýlardyń jaǵasyndaǵy jasyl jelekterde jáne butalardyń shybyqtarynda ańdyp turady. Sondyqtan ormanda joldyń ortasynda júrgen lázim. Ormanda túneý barysynda sý jáne qalyń shópten aýlaq, bıik jerde damyldaǵan durys», - dedi ol «QazAqparat» agenttiginiń tilshisimen suhbattasý kezinde.
Onyń aıtýynsha, keneler qalyń kıimnen óte almaıdy. Sondyqtan deneniń ashyq qalýyn boldyrmaý qajet. Kıimniń moıyn jaǵasy men jeńderi denege jabysyp turýy tıis. Qolǵa jáne moıynǵa arnaıy zattardy jaǵyp otyrǵan durys.
«Keneler denege birden qadalyp, qan almaıdy. Olar biraz ýaqyt kıimde jáne denede terisi juqalaý, qozǵalys barysynda kedergi keltirmeıtin yńǵaıly oryn izdeıdi. Sondyqtan úıge kelisimen kıimniń jáne deneniń barlyq jerlerin qarap shyqqan jón. Ásirese uıqyǵa jatar aldynda kıimderdi jiti tekserip, balalardyń denesin qarap shyǵý qajet. Eger kene shaqqan bolsa, ony teriden birden alyp tastaýǵa asyǵyńyz», - dep atap ótti ol.
Keneni deneden almas buryn ony jermaımen nemese vazelınmen jaqqan abzal, sol kezde keneler tez alynady. Ony alǵannan soń qoldy sabynmen jýyp, jaraǵa ıod jaǵyp qoıǵan lázim. Sosyn mindetti túrde dárigerlerge kóriný kerek.
