Kongo-Qyrym gemorragııalyq bezgegi aýrýy boıynsha kúmándy esepter bergeni úshin Jambyl oblysynyń bas sanıtarlyq dárigeri qyzmetinen ketýi múmkin

Búgin Densaýlyq saqtaý mınıstri J.Dosqalıevtiń tóraǵalyǵymen ótken QR Úkimeti janyndaǵy Densaýlyq saqtaý jónindegi ulttyq úılestirý keńesiniń otyrysynda vedomstvo basshysy men QR Prezıdenti ákimshiliginiń ókilderi, KQGB-nyń tabıǵı oshaqtary men 2010 jylǵy epıdemııalyq maýsymǵa daıyndyq boıynsha eldiń Bas sanıtarlyq dárigeri Keńes Ospanov pen vırýs keń tarap otyrǵan - Ońtústik Qazaqstan, Qyzylorda jáne Jambyl oblystary ákimderi orynbasarlarynyń esepterin tyńdady.

Máselen, OQO ákiminiń orynbasary Sáken Qanybekov, aımaqta KQGB aýrýyna qarsy barlyq aldyn alý sharalary júrgizile bastaǵandyǵy týraly aıtyp, aımaq epıdemıologııalyq maýsymǵa tolyǵymen daıyn dep sendirdi. Óz kezeginde J.Dosqalıev, OQO-da atqarylyp jatqan sharalarǵa qanaǵattanbaıtynyn bildirip, óńirde ústimizdegi sáýir aıynyń ózinde indetke shaldyǵýdyń 2 oqıǵasy tirkelgendigin alǵa tartty.

«Bul is júzinde me, álde qaǵaz júzinde atqarylyp jatqan jumystar ma?! Eger bólingen qarajat jetpeı jatsa Úkimet tarapynan kómekterdi jumyldyratyn bolamyz», - dedi ol.

Al Jambyl oblysy ákiminiń orynbasary Meırambek Tólepbergenniń esebin Densaýlyq saqtaý mınıstri tipti kúmándanarlyq dep tapty. Máselen, buǵan deıin zertteý júrgizý úshin bir jylda kenelerdiń 28 myńǵa jýyǵy ustalǵan bolsa, M.Tólepbergen esep bergen sáýir-mamyr aılarynda, ıaǵnı 12 kúnniń ishinde sanepıdmamandary olardyń 30 myńǵa jýyǵyn ustap úlgergen bolyp shyqty.

Oblys boıynsha KQGB-nyń naqty jaǵdaıyn kórsetpeıtin osy syndy birneshe kúmándanarlyq kórsetkishterdiń bolýy sebepti, J. Dosqalıev eldiń Bas sanıtarlyq dárigeri K.Ospanovqa Jambyl oblysy ákimdigine KQGB aýrýy boıynsha kúmándanarlyq esepter bergeni úshin oblystyń Bas sanıtarlyq dárigeri Serik Qasmaqasovqa qyzmetinen bosatýǵa deıingi sharalardy qoldanýdy tapsyrdy.

«Bul qaterli indet ekenin taǵy qaıtalap aıtamyn. Adamdardyń taǵdyrlarymen bulaı oınamaý kerek», - dedi mınıstr.

Aıta keteıik, 2005-2009 jyldar aralyǵynda OQO-da KQGB aýrýynyń aldyn alý jumystaryna qarajat múldem bólinbeı kelgen. Ótken jyly respýblıka boıynsha tirkelgen 26 oqıǵanyń 22-si osy óńirde anyqtaldy. Sol jyldan bastap indetke qarsy jumystarǵa oblys bıýdjetinen qarajattar qaıta bóline bastady. 2010 jyly osy maqsattarǵa OQO-da - shamamen 250 mıllıon, Jambyl oblysynda - 44,1 mıllıon jáne Qyzylorda oblysynda - 35 mıllıonnan astam teńge bólindi.