Kongo qıyn sátterdegi Qazaqstan qoldaýyn esh ýaqytta umytpaıdy — Felıks Chısekedı

ASTANA. KAZINFORM — Kongo qıyn sátterdegi Qazaqstan qoldaýyn esh ýaqytta umytpaıdy. Bul týraly Aqordada Memleket basshysy Qasym-Jomart Toqaevpen keńeıtilgen quramdaǵy kelissózder barysynda Kongo Demokratııalyq Respýblıkasynyń Prezıdenti Felıks Chısekedı aıtty. 

— Afrıka men Ortalyq Azııa órkendeý, turatqylyq jáne ınnovatsııalar úshin myǵym kópirdi birlese qurýǵa nıetti. Osy oraıda, joǵary mártebeli Prezıdent myrza, Kongo halqynyń atynan jyly qabyldaǵanyńyz úshin shynaıy rızashylyǵymdy bildirgim keledi. Bul jerden baýyrlastyq qarym-qatynasqa kýá boldyq. Geografııalyq turǵyda bir-birinen shalǵaı ornalasqanyna qaramastan halqymyz ustanatyn qundylyqtar uqsas bolyp keledi. Bul egemendikke, aýmaqtyq tutastyqqa qurmetpen qaraý, dıalog arqyly beıbitshilik jolyn izdeý. Kongo Demokratııalyq Respýblıkasy eń kúrdeli sáttegi halyqaralyq qoǵamdastyq pen Qazaqstan qoldaýyn esh ýaqytta umytpaıdy. Naqtyraq aıtqanda, Qazaqstan BUU aıasynda qoldaý kórsetý arqyly Kongo halqymen birge boldy, — dedi mártebeli meıman.

Sondaı-aq Kongo Prezıdenti eki el arasyndaǵy ekonomıkalyq baılanystarǵa toqtala kele yntymaqtastyq úshin naqty múmkindikter bar ekenin aıtty.

— Elderimizde óte kóp ken orny bar. Kongoda kobalt pen mys, al Qazaqstanda ýran ken oryndary bar. Sondyqtan kúsh jigerimizdi atalǵan ónimderdi jergilikti jerde óńdeýge baǵyttaı alamyz. Osy oraıda damý men qurmettiń, qorshaǵan ortaǵa degen jaýapkershiliktiń balamasyna aınalǵan Qazaqstannyń ERG kompanııamen tabandy yntymaqtastyqty erekshe atap ótkim keledi, — dedi Felıks Chısekedı.

Kelissózder barysynda Memleket basshysy Qazaqstan men Kongo arasyndaǵy qarym-qatynastyń keleshegi zor ekenin aıtty.